ESA gerði athugun hjá SKEL

Eftirlitsstofnun EFTA (ESA) gerði í dag athugun hjá SKEL fjárfestingafélagi hf. á grundvelli ákvörðunar ESA um athugun á starfsemi Lyfjavals ehf.

Þetta kemur fram í tilkynningu frá félaginu. 

Frétt af mbl.is

Fyrirvaralaus athugun ESA á Íslandi

Þar segir að fyrirtækjum  sé lagalega skylt að gangast við athugun sem framkvæmd sé á grundvelli ákvörðunar ESA í samræmi við 4. mgr. 20. gr. II. kafla bókunar 4 við samning EFTA-ríkjanna um stofnun eftirlitsstofnunar og dómtóls.

Athugunin hluti af mögulegri markaðsskiptingu á markaði með lyf

„Lyfjaval er í eigu Heimkaupa ehf., sem aftur er í 81% eigu SKEL og tengdra félaga. Samkvæmt ákvörðun ESA er athugunin hluti af athugun á mögulegri markaðsskiptingu á smásölumarkaði með lyf. Nánar tiltekið í hefðbundin apótek og bílalúguapótek. Meint markaðsskipting á að hafa falist í því að Lyfjaval lokaði hefðbundnu apóteki í Mjódd og einbeitt sér að því að starfsrækja bílalúguapótek. SKEL hefur áætlað markaðshlutdeild Lyfjavals í kringum 10%,“ segir í tilkynningunni. 

Þá segir, að SKEL hafi eignast Lyfjaval að hluta 25. júní 2021. Lyfjaval hafi verið keypt að fullu þann 29. mars 2023. Félög tengd SKEL eiga og reka 7 apótek, þar af 5 bílalúguapótek. Öll bílalúguapótek eru einnig hefðbundin apótek, þ.e. þar sem gengið er inn. Frá árinu 2022 hafa þrjú ný apótek verið opnuð, að því er félagið greinir frá. 

Athugunin snýr að viðskiptum þegar Lyfjaval seldi verslunarhúsnæði í Mjódd

„Athugun ESA snýr meðal annars að viðskiptum þegar Lyfjaval seldi verslunarhúsnæði í Mjódd í eigu félagsins til Lyf og heilsu með samningi 26. apríl 2022. Samkeppniseftirlitinu var sérstaklega tilkynnt um þau viðskipti. Samkeppniseftirlitið lauk málinu með ákvörðun nr. 1/2023 þann 2. mars 2023. Málið var kært til áfrýjunarnefndar Samkeppnismála sem úrskurðaði í málinu þann 9. ágúst 2023.

SKEL og Lyfjaval munu aðstoða við athugun málsins og hafa veitt ESA aðgang að umbeðnum upplýsingu. SKEL hefur enga ástæðu til að ætla að brotið hafi verið gegn samkeppnislögum í starfsemi Lyfjavals,“ segir í tilkynningunni. 

• Blogga um frétt