Edda, Hólmfríður og Orri til Aton

Edda Kristín Óttarsdóttir, Hólmfríður Benediktsdóttir og Orri Eiríksson hafa verið ráðin til Aton. Edda mun sinna kvikmyndagerð, Hólmfríður hönnun og Orri hugmynda- og textasmíð. Þau hafa öll þegar hafið störf hjá fyrirtækinu.

Fram kemur í tilkynningu Aton að Edda hafi áratuga reynslu af kvikmyndagerð, við upptökur, klippingu eða eftirvinnslu. Hún hafi unnið að gerð fjölda auglýsinga, tónlistarmyndbanda og heimildarmynda. 

Hólmfríður útskrifaðist sem grafískur hönnuður frá LHÍ árið 2022 og með meistaragráðu í leturhönnun árið 2024 frá Écal skólanum í Sviss. Hún nam einnig leturhönnun við UMPRUM skólann í Prag.

Orri hefur starfað við hugmynda- og textasmíð í fjölda ára, fyrst hjá Maurum auglýsingastofu og svo hjá Baklandi Creative. Þá hafa ótal frasar, slagorð og markaðsskilaboð hafa runnið undan rifjum Orra og þá hefur hann komið að sköpun nokkurra vörumerkja frá grunni og unnið að verðlaunuðum auglýsingaherferðum. 

„Það er okkur mikið gleðiefni að geta greint frá ráðningu þessa öfluga fólks, sem þegar er farið að setja mark sitt á starfsemi Aton. Þau Edda, Hólmfríður og Orri koma úr ólíkum áttum og sinna ólíkum verkefnum, en eiga það sameiginlegt að geta horft á öll verk frá nýjum hliðum og leyst úr verkefnum á skapandi og skemmtilegan hátt,“ segir Sif Jóhannsdóttir rekstrarstjóri Aton í tilkynningunni.

• Blogga um frétt