Afkoman í takt við áætlanir

Afkoma óskráðra rekstrarfélaga í meirihlutaeigu SKEL er heilt yfir í takt við það sem var greint frá í hálfsársuppgjöri félagsins. Frá þessu er greint í tilkynningu til Kauphallarinnar.

SKEL flokkar rekstrarfélögin í eignasafninu annars vegar sem félög á neytendamarkaði og hins vegar sem innviði og félög á fyrirtækjamarkaði. 

Fyrirtækjamarkaður og innviðir

• Styrkás, þ.e. Skeljungur, Klettur og Stólpi (Eignarhlutur SKEL er 63,4%)
• Gallon (Eignarhlutur SKEL er 100%)

Neytendamarkaður

• Orkan, þ.e. Orkan og Löður (Eignarhlutur SKEL er 100%)
• Heimkaup, þ.e. Lyfjaval ehf., Prís, 10-11, Extra o.fl.  (Eignarhlutur SKEL er 81%)

Afkomuna má sjá í töflunni hér:

Úr tilkynningu SKEL til Kauphallar.

Rekstur Styrkáss umfram áætlanir

Rekstur Styrkáss hefur gengið vel og var umfram áætlun á fjórðungnum. Innan samstæðu félagsins núna eru Skeljungur, Klettur og Stólpi. Rekstur Gallon ehf. er á áætlun. Seld var fasteign á Fálkavöllum að andvirði 143 milljónum króna sem hefur 105 milljóna króna áhrif á EBITDA félagsins á tímabilinu.

SKEL og sérhæfður fjárfestir eiga í viðræðum um viðskipti með 100% hlutafjár í Gallon. Fram kemur að nánar verði upplýst um framgang þessa máls eftir því sem tilefni er til.

Hagræðingaraðgerðir muni skila árangri

Rekstur Orkunnar gengur vel og var umfram áætlun á fyrstu níu mánuðum ársins. Sala á raforku er í samræmi við áætlanir félagsins. Heimkaup opnaði lágvöruverðsverslunina Prís og hafa viðtökur verið góðar. Áskoranir hafa annars verið í rekstri annarra verslana sem hefur verið undir væntingum en gripið hefur verið til hagræðingaraðgerða sem munu skila árangri á næstu mánuðum. 

Hagnaður af skráðum hlutabréfum í eigu félagsins nam 1.069 milljónum króna á 3. fjórðungi ársins. Helstu skráðar hlutabréfastöður í lok fjórðungsins eru 2.747 milljónir króna í Skaga og 3.644 milljónir króna í Kaldalóni. Aðrar skráðar hlutabréfaeignir námu 1.674 milljónum króna í lok fjórðungsins. Lánsfjármögnun stóð í 4.236 milljónum króna í lok fjórðungs og reiðufé og ríkisskuldabréf voru 3.964 milljónir króna. 

Kaup á síðari hluta íbúða við Stefnisvog, sem eru 50 talsins, munu ganga í gegn á fjórða ársfjórðungi. Fasteign í Litlatúni var seld í október. Söluverð var 460 milljónir króna og hefur verið að fullu greitt. Fasteignin var bókfærð á 370 milljónir króna. 

Kortleggja tækifæri í Evrópu

Unnið hefur verið markvisst síðustu 18 mánuði að kortlagningu tækifæra á smásölumarkaði (e. retail) í Evrópu en SKEL hefur lýst því yfir að til framtíðar sé ætlunin að auka hlutfall erlendra eigna í eignasafni félagsins.

Fjárfesting SKEL í belgísku verslunarkeðjunni INNO var gerð í gegnum félagið Stork ehf. sem er 100% í eigu SKEL. Hlutverk Stork verður að halda utan um erlendar eignir SKEL með skýrt skilgreindum markmiðum og stjórn.

SKEL áætlar að opna fyrir fjárfestingu annarra í Stork ehf. til að efla félagið, ná fram eignadreifingu og nýta þau tækifæri sem það telur að séu til staðar. 

• Blogga um frétt