Viðskipti | mbl | 6.11.2024 | 8:31 | Uppfært 12:36

SFF tekur undir áhyggjur Seðlabankans

Heiðrún Jónsdóttir, formaður Samtaka fyrirtækja í fjármálaþjónustu.

Forstjórar fjármálaeftirlita á Norðurlöndum sendu nýlega sameiginlegt bréf til fimm evrópskra eftirlitsstofnana þar sem kallað er eftir að þær dragi úr og einfaldi reglugerðafargan á neytendur og fjárfesta og á fjármálamarkaði.

Fram kemur í bréfinu að það verði að einfalda reglurnar svo þær hafi sem minnst áhrif á neytendur og fjárfesta.

Forstjórarnir hvetja evrópska eftirlitsaðila til að taka höndum saman um að minnka reglubyrði á fyrirtæki og leitast fremur við að styðja við fjármálamarkaði innan Evrópu.

Flókið regluverk geti verið áhættuþáttur

Heiðrún Jónsdóttir, framkvæmdastjóri Samtaka fyrirtækja í fjármálaþjónustu, segir samtökin taka undir þær áhyggjur sem fram koma í bréfinu.

„Við tökum heilshugar undir áhyggjur Seðlabankans og systurstofnana bankans á hinum Norðurlöndunum af umfangi og flækjustigi evrópska regluverksins um fjármálastarfsemi og styðjum eindregið að ráðist verði í einföldun á því. Við hjá SFF höfum ítrekað bent á að flóknar reglur leiði ekki endilega af sér meira öryggi heldur sé fremur til þess fallnar að verða sérstakur áhættuþáttur. Það hefur allt í senn áhrif á eftirlitsaðila, fjármálafyrirtæki og viðskiptavini þeirra,“ segir Heiðrún.

Á fundi samtakanna með Evrópsku bankasamtökunum hafi sömu áhyggjur verið viðraðar.

„Bent var á að veruleg hætta sé á að ofregluvæðing komi niður á samkeppnishæfni og lífskjörum í Evrópu. Kollegar okkar á hinum Norðurlöndunum hafa bent á að núverandi löggjöf telji um 3.500 blaðsíður en miðað við áform um frekari reglusetningu stefni í að það aukist í um 6.000 síður,“ segir hún.

Framkvæmi kostnaðarmat

Þá taki þau undir ákall norrænu fjármálaeftirlitsstofnanna um að framkvæmt verði vandað og áreiðanlegt kostnaðarmat við laga- eða reglusetningu á vettvangi ESB.

„Raunar á hið sama einnig við á Íslandi. Til að mynda þegar verið er að innleiða EES-tilskipanir með íþyngjandi séríslenskum ákvæðum, svokallaðri gullhúðun eða blýhúðun, sem of oft er gert án fullnægjandi kostnaðarmats. Í þessu samhengi má minna á að gullhúðun hefur verið beitt í um helmingi innleiðinga tengdri fjármálaþjónustu samkvæmt nýlegri meistararitgerð, en slíkt eykur flækjustigið í löggjöfinni enn frekar.

Engu að síður hafa mörg skynsamleg skref verið tekin á undanförnum árum í tengslum við laga- og regluverk á fjármálamarkaði, enda er skýrt og skilvirkt regluverk nauðsynlegur hlutur af skilvirkri fjármálastarfsemi,“ segir hún að lokum.