Kínverjar búa sig undir 60% tolla Trumps

Kínverska ríkisstjórnin mun á næstu dögum greina frá nýjum efnahagsaðgerðum til að efla kólnandi hagkerfi sitt, þar sem hún býr sig undir annað kjörtímabil Donalds Trumps sem forseta Bandaríkjanna.

Fram kemur í fréttaskýringu BBC að Trump hafi lofað bandarískum kjósendum að leggja á háa innflutningsskatta, þar á meðal allt að 60% tolla á kínverskar vörur.

Trump þykir líklegur til að fylgja því eftir, þar sem hann setti 25% tolla á kínverskar vörur á fyrra kjörtímabili sínu.

Samdráttur á fasteignamarkaði, vaxandi atvinnuleysi, hækkandi ríkisskuldir og minni einkaneysla hafa dregið úr hagvexti í Kína eftir heimsfaraldurinn.

Þá er líklegt að sigur Trumps muni bæði koma í veg fyrir áætlanir Xi Jinping, leiðtoga kínverska Kommúnistaflokksins, um að gera landið efnahagslegu stórveldi – og hamla enn frekar samskiptum á milli tveggja stærstu hagkerfa heimsins.