Hagar kaupa SMS í Færeyjum
Setja bókamerki
Búið er að undirrita kaupsamning um kaup Haga hf. á P/F SMS í Færeyjum, sem rekur m.a. átta Bónus verslanir, og kaupverðið nemur rúmlega níu milljörðum króna, eða 467 milljónum danskra króna. Virði hlutafjár nemur um 6,3 milljörðum króna.
Þetta kemur fram í tilkynningu Haga.
Öll skilyrði vegna kaupanna hafa verið uppfyllt, þar með talið áreiðanleikakönnun og samþykki eftirlitsaðila í Færeyjum. Hagar segja að markmið kaupanna sé að renna frekari stoðum undir og styrkja rekstur Haga á sviði dagvöruverslunar og auka skilvirkni rekstrar og vöruúrval SMS í Færeyjum.
Greiða 267 milljónir danskra króna með reiðufé
Hagar greiða kaupverð með reiðufé að upphæð um 267 milljónum danskra króna og afhendingu 13.867.495 hluta í Högum að virði 60 milljónum danskra króna. Meðalgengi á hlutum Haga í viðskiptunum var 85,23 kr., sem byggir að stærstu leyti á dagslokagengi Haga þann 18. október.
Endanlegt uppgjör vegna kaupanna gæti breyst lítillega, að er kemur fram í tilkynningunni, tengt rekstrarafkomu SMS á næstu 2-3 árum.
Hagar fjármögnuðu hluta kaupverðs með nýju 200 milljóna danskra króna láni en til viðbótar yfirtaka Hagar nettó skuldir SMS upp á um það bil 140 milljónir danskra króna. Skuldsetning Haga eykst sem því nemur.
Munu áfram njóta forystu forstjóra SMS
Miðað er við að uppgjörsdagur vegna kaupanna sé mánudagurinn 2. desember
„Það er mér mikil ánægja að bjóða SMS í Færeyjum velkomin í Haga fjölskylduna. Við höfum á síðustu mánuðum kynnst starfsemi SMS vel, en fyrirtækið er bæði vel rekið og þjónar mikilvægu hlutverki í færeysku samfélagi. Áherslur í starfsemi SMS, m.a. á hagkvæmustu matarkörfuna og góða upplifun í verslunum, ríma vel við leiðarljós okkar hjá Högum. Við erum stolt af því að vera treyst fyrir eignarhaldi á SMS til framtíðar og munum styðja við áframhaldandi þróun og vöxt félagsins, Færeyingum til hagsbóta,“ er haft eftir Finni Oddssyni, forstjóra Haga, sem heldur áfram:
„SMS mun áfram njóta forystu Niels Mortensen, forstjóra, sem hefur leitt kröftuga uppbyggingu félagsins undanfarna tvo áratugi. Við hlökkum til samstarfs við Niels og framúrskarandi hóp starfsfólks í Færeyjum um að efla góðan rekstur enn frekar, m.a. með því að nýta tækifæri til að auka hagkvæmni, efla vöruval og þjónustu við landsmenn.“
„Það er mjög langt á milli manna“
Vopnahlé verður samþykkt
Hætt við því að vegir teppist á kjördag
Vonast eftir nýjum kjarasamningi í dag
Fyrstu vetrarkosningar síðan 1979
Settu á svið umferðarslys til að svíkja út fé
Haraldur: Þörf á uppbyggingunni
