Niðurfærsla á gengi Controlant litar afkomuna

Samstæða Vátryggingafélags Íslands hagnaðist um 427 milljónir króna eftir skatta á þriðja ársfjórðungi þessa árs samanborið við 607 milljóna króna hagnað á sama tímabili í fyrra.

Áframhaldandi tekjuvöxtur í tryggingastarfsemi með 9,8% vöxt milli ára. Kostnaðarhlutfall fer lækkandi og samsett hlutfall í takt við markmið.

Hreinar tekjur í fjármálastarfsemi nema 492 milljónum króna á fjórðungnum og vaxa um 86% milli ára í pro-forma samanburði. Eigið fé samstæðu nemur 20,4 milljörðum króna en arðsemi eigin fjár nam 8,5% á ársgrundvelli en hún nam 14,6% á síðasta ári.           

60% niðurfærsla

Fjárfestingatekjur á þriðja fjórðungi námu 713 milljónum króna eða því sem nemur 1,6% nafnávöxtun. Fjárfestingatekjur fyrstu 9 mánuði ársins námu samtals 2.011 milljónum króna sem samsvarar 4,6% ávöxtun.

Ávöxtun af skráðum hlutabréfum tók við sér á fjórðungnum og námu 293 milljónum króna, en rúmlega 60% niðurfærsla á gengi Controlant, úr 80 krónur á hlut í 30 krónur á hlut, hafði neikvæð áhrif á ávöxtun. Námu áhrif af lækkun á virði Controlant alls um 417 milljónum króna á fjórðungnum.

Ætla að lækka árlegan rekstrarkostnað um 300 milljónir

Félagið horfir til þess að auka skilvirkni innan samstæðunnar, og hafa nýverið ráðist í aðgerðir sem miða að því að lækka árlegan rekstrarkostnað samstæðunnar um 300 milljónir króna.

Samhliða þessu horfir félagið til þess að ná fram árlegri kostnaðarsamlegð í fjármálastarfsemi um ríflega 220 milljónir með innkomu Íslenskra verðbréfa í samstæðuna. Samanlagt eiga þessar aðgerðir að skila samstæðunni ríflega 500 milljóna afkomubata horft fram á veginn.

Grunnreksturinn gengið vel

Haft er eftir Haraldi Þórðarsyni forstjóra samstæðunnar í uppgjörstilkynningu að grunnrekstur samstæðunnar hafi gengið vel á þriðja ársfjórðungi ársins.

„Áframhaldandi vöxtur einkenndi tryggingastarfsemina og undirliggjandi arðsemi batnaði áfram líkt og undanfarna fjórðunga. Iðgjaldavöxtur var 9,8% á fjórðungnum sem er í takt við áætlanir og samsett hlutfall var 92,3% sem er talsverð lækkun á milli ára. Tekjur af fjármálastarfsemi halda áfram að vaxa og afkoman fer batnandi eftir nokkrar sveiflur á fyrri hluta árs. Aukin umsvif á fjármálamörkuðum með haustinu gefa jafnframt tilefni til bjartsýni varðandi komandi misseri. Ávöxtun af fjárfestingaeignum á tímabilinu var undir markmiðum en niðurfærsla á virði Controlant í litaði afkomu fjárfestinga talsvert. Á fyrstu 9 mánuðum ársins var grunnrekstur samstæðunnar í takt við markmið og eru horfur ársins og rekstrarmarkmið til lengri tíma óbreyttar,” segir Haraldur.

• Blogga um frétt