Samið um kaup á 28 vindmyllum á 20 milljarða
Setja bókamerki
Landsvirkjun hefur samið við þýska vindmylluframleiðandann Enercon um kaup, uppsetningu og rekstur á 28 vindmyllum sem settar verða upp í Búrfellslundi við Vaðöldu.
Fyrri 14 vindmyllurnar verða reistar snemma árs 2026 og gangsettar seinna um árið. Reiknað er með að vindorkuverið verði að fullu tilbúið og komið í rekstur fyrir lok ársins 2027, að því er Landsvirkjun greinir frá.
Fram kemur í tilkynningu, að Landsvirkjun hafi auglýst útboð á vindmyllunum í janúar, með fyrirvara um leyfis- og skipulagsmál. Útboðsgögnin og öll vinna við útboðsferil og samningagerð var unnin með ráðgjöfum Landsvirkjunar, dönsku lögfræðiskrifstofunni Kromann Reumert og alþjóðlegu verkfræðistofunni Afry.
Þá segir, að öll nauðsynleg leyfi hafi legið fyrir í október. Þrír framleiðendur tóku þátt í útboðsferlinu. Enercon GmbH átti hagkvæmasta tilboðið, 140 milljónir evra sem eru rúmir 20 milljarðar kr.
Þjónustusamningur til 15 ára
„Framleiðandi vindmyllanna, Enercon, hefur reynslu af uppbyggingu og rekstri vindmylla hér á landi því fyrirtækið framleiddi vindmyllurnar sem Landsvirkjun hefur rekið í tilraunaskyni á Hafinu frá 2013, auk þess sem vindmyllur í Þykkvabæ eru frá Enercon komnar,“ segir í tilkynningunni.
Þá kemur fram, að í samningi Landsvirkjunar og Enercon felist hönnun, framleiðsla, flutningur, uppsetning og prófanir á 28 vindmyllum. Þegar vindorkuverið sé fullbúið taki við þjónustusamningur til í það minnsta 15 ára.
Ljúka vegagerð á svæðinu
„Áður en til kasta Enercon kemur verður lokið við vegagerð á svæðinu við Vaðöldu, auk þess sem byggja þarf vindmylluplön, smíða undirstöður undir vindmyllurnar o.fl. Sú mannvirkjagerð hefst á næsta ári, en stefnt er að útboði þess verks fyrir lok ársins.
Samhliða uppbyggingu vindorkuversins við Vaðöldu hyggst Landsvirkjun reisa þjónustubyggingu fyrir vindorkuverið á Hellu,“ segir í tilkynningunni.
Myndatexti: Samið um kaup á 28 vindmyllum á 20 milljarða. Ásbjörg Kristinsdóttir, framkvæmdastjóri Framkvæmda hjá Landsvirkjun, Uli Schulze Südhoff, framkvæmdastjóri viðskiptasviðs Enercon, Hörður Arnarson, forstjóri Landsvirkjunar og Steinunn Pálmadóttir, lögmaður hjá Landsvirkjun.
Hraunflæðinu í átt að Svartsengi er lokið í bili
Leggja nýjan veg í gegnum glóandi hraunið
Mega lækka lífeyrisrétt yngra fólks
„Eins og við séum að leggja börn á hlaðborð“
Svartsengislína: Líklega aftur í rekstur fyrir helgi
„Ég held að þetta sé allt saman á góðri leið“
„Það er tvísýnt með færð á láglendi á laugardag“
