KEA kaupir 120 leiguíbúðir

Kaupfélag Eyfirðinga (KEA) hefur fest kaup á eignasafni íbúðafélagsins Ívera (áður Heimstaden) á Akureyri.

Um er að ræða um 120 íbúðir og kaupverð þeirra liðlega 5 milljarðar króna.

Þetta kemur fram í tilkynningu frá Íveru.

Ívera hverfur frá Akureyri

Ívera hefur áform um tvöföldun á eignasafni sínu sem í dag telur um 1.600 íbúðir. Sala eignanna á Akureyri er liður í endurskipulagningu á eignasafni félagsins segir í tilkynningu.

Viðskiptin munu ekki hafa neikvæð áhrif á núverandi leigutaka og lögðu Ívera og KEA áherslu á áframhaldandi húsnæðisöryggi fyrir leigutaka íbúðanna að því er segir í tilkynningu.

Stefna KEA er að reka íbúðirnar til langs tíma en viðskiptin marka brotthvarf Íveru af íbúðamarkaði á Akureyri en félagið stefnir ekki á frekari umsvif þar í náinni framtíð.

Stefnt er að því að afhenda eignirnar fyrir jól.

Ein stærsta fjárfesting KEA

Egill Lúðvíksson, forstjóri Íveru, og Halldór Jóhannsson, framkvæmdastjóri KEA, undirrituðu kaupsamninginn fyrr í dag.

Haft er eftir Agli í tilkynningu sem segir:

„Það er ánægjulegt að skerpa á rekstri félagsins með þessari endurskipulagningu í okkar rekstri og horfa á eftir eignunum á Akureyri í hendur trausts aðila með metnaðarfull langtímaáform.

Eignirnar eru vel staðsettar og hafa verið eftirsóttar á leigumarkaði. KEA er rótgróinn fjárfestir í sínu nærumhverfi og gildi þeirra fara vel saman við okkar. Ég trúi að leigutakarnir verði ánægðir með þessi viðskipti.“

Þá er haft eftir Halldóri í tilkynningu sem segir:

„Þessi kaup eru fyrsta skref KEA inn á íbúðaleigumarkaðinn hér á nærsvæði okkar en í gegnum dótturfélagið Skálabrún hyggst KEA byggja upp til lengri tíma safn íbúða til almennrar útleigu.

Það er ekkert stórt sérhæft og staðbundið félag um leigu íbúða á almennum markaði hér á þessu svæði og við erum að breyta þeirri umgjörð með þessum kaupum. Það hefur skort félag eins og þetta á þessum markaði og þessi fjárfesting muni til lengri tíma styrkja almennan íbúðaleigumarkað á svæðinu.

Þetta er ein stærsta fjárfesting KEA í nokkurn tíma en hún er liður í þeim breyttu áherslum hjá félaginu að auka verulega vægi fasteignatengdra verkefna á efnahagsreikningi sínum ásamt því að fækka og stækka þau verkefni sem eru á höndum félagsins. Ásamt því að reka íbúðaleigufélag stefnum við á að taka þátt í þróunarverkefnum ýmiss konar á fasteigna- og íbúðamarkaði á okkar nærsvæði.“

• Blogga um frétt