Gengi Íslandsbanka vanmetið

Alexander J. Hjálmarsson hjá Akkur – Greining og ráðgjöf hefur gefið út nýtt verðmat á Íslandsbanka. Þar kemur fram að verðmat hans á bankanum sé markgengi í lok árs 2024 upp á 164 kr. á hlut. Bjartsýnni spá hans er allt upp í 182 kr. á hlut. Hér gerir Alexander ráð fyrir 10,7% ávöxtunarkröfu eigin fjár og 3,5% eilífðarvexti.

Samkvæmt þessu er markaðurinn töluvert undirvigtaður enda gengi bankans á markaði nú um 122 kr. á hlut.

Í spánni er gert ráð fyrir að arðgreiðslur og endurkaup eigin bréfa verði töluverð á næstu 3 árum eða um 45% af markaðsvirði.

„Ég tel bæði Arion banka og Íslandsbanka mjög áhugaverða fjárfestingakosti þegar horft er á áhættu vegna væntrar ávöxtunar þar sem þeir eru með gríðarlega mikið umfram eigið fé sem þeir vilja skila til hluthafa. Þegar þeir verða komnir nær eiginfjármarkmiðum sínum verður arðsemi þeirra töluvert hærri sem réttlætir hærri margfaldara á eigið fé,“ segir Alexander.

„Ísland er í vaxtalækkunarferli sem mun ýta undir arðsemi bankanna á þóknanahliðinni í gegnum auknar lántökur, fleiri fyrirtækjaverkefni og aukin umsvif á verðbréfamörkuðum. Fjárfestar mega ekki gleyma því að auknar þóknanatekjur skila nánast hreinum hagnaði þar sem það er lítill sem enginn jaðarkostnaður við þær.“ bætir Alexander við.

Í greiningunni kemur fram að fyrirhuguð sala ríkisins á 42,5% hlut sé bæði kostur og galli. „Það eru lítil skoðanaskipti sem eiga sér stað um hlutabréf Íslandsbanka í dag þar sem eignarhaldið er gríðarlega þröngt. Það eru engir einkafjárfestar á hluthafalistanum sýnilegir og aðeins einn hlutabréfasjóður er með Íslandsbanka meðal 10 stærstu eigna.“

Alexander nefnir jafnframt að umræða í samfélaginu sé alltof neikvæð um bankarekstur, hagnaður ekki settur í samhengi við fjármuni sem bundnir séu í rekstri. Pólitísk umræða sé jafnframt of neikvæð og margir sem líti á bankaskatt, jafnvel eftir hækkun sértækra skatta, sem sjálfsagðan hlut.