Bora eftir háhita í 1.800 metra hæð

Annar af tveimur borum Jarðborana á Filippseyjum er að störfum í 1.800 metra hæð yfir sjávarmáli, á hæsta fjalli landsins. Þetta segir Egill Arnar Sigurþórsson rekstrarstjóri í samtali við ViðskiptaMoggann.

Egill hóf störf á Filippseyjum í byrjun ágúst sl. Borinn var fluttur í skipi frá Íslandi í apríl 2024. Seinni borinn bættist svo við í ágúst og kom frá Nýja-Sjálandi.

„Við erum að vinna á stærsta háhitasvæði Filippseyja. Við erum að gera það sem við kunnum best og höfum gert í áratugi, að bora djúpar háhitaholur til að framleiða rafmagn,“ útskýrir Egill.

Jarðboranir eru með skrifstofu í Manilla, höfuðborg Filippseyja. Þar starfar Egill. „Við erum að bora á tveimur eyjum sunnarlega í landinu. Annar staðurinn er í fjallshlíð í 1.800 metra hæð yfir sjávarmáli á hæsta fjalli landsins. Hér er allt skógi vaxið frá fjalli til fjöru og því dálítið öðruvísi umhorfs en á Nesjavöllum til dæmis,“ segir Egill og hlær.

Framleiða 2.000 MW

Hann segir Filippseyinga þriðju atkvæðamestu þjóð í heimi í nýtingu jarðhita til rafmagnsframleiðslu. „Þeir framleiða um 2.000 megavött á ári en á Íslandi eru til samanburðar framleidd 600 MW á ári. Þeir einu sem eru stærri í þessum bransa eru Bandaríkin og Indónesía. Um 25-30% allrar raforku Filippseyja koma úr jarðhita.“

Egill segir að Filippseyingar séu með mjög metnaðarfull markmið í jarðhitavinnslu. „Þeir framleiða líka rafmagn með olíu og gasi. Svo eru þeir aðeins í fallvatnsvirkjunum. Það er hins vegar erfiðara að eiga við þær. Hér koma svo miklar rigningar og fellibyljir sem gerir að verkum að það er erfiðara að stjórna þeim en heima á Íslandi t.d. Filippseyingar eru með fjárfestingaráætlun til ársins 2030 og ætla að auka háhitaframleiðsluna um 30-50%.“

Egill Arnar Sigurþórsson.

Næg tækifæri eru í jarðhita í landinu enda mörg svæði órannsökuð. „Filippseyjar eru 7.600 talsins, þó að sumar eyjarnar séu bara sker og rif,“ segir Egill.

Spurður að því hvort umræða um orkuskort sé í gangi í landinu eins og á Íslandi segir Egill svo ekki vera. „En þetta er rosalega vaxandi samfélag. Þetta er fjórtánda stærsta þjóð í heimi með 120 milljónir íbúa. Þeim er búið að fjölga um 30 milljónir á síðustu 30 árum. Þetta er það hagkerfi í Suðaustur-Asíu sem vex hvað hraðast.“

Egill segir að umræðan snúist mest um að skipta út orkukostum, að fara úr olíu og kolum yfir í háhita. „Hér er enginn að stinga upp á kolefnishlutleysi árið 2030, eða að banna dísilbíla.“

Eina í landinu

Aðspurður segir Egill að Jarðboranir séu eina erlenda fyrirtækið í landinu með stóra bora. „Við erum að bora 2.500-3.000 m djúpar holur og erum nýbúnir að klára fimmtu holuna.“

120-130 manns vinna hjá Jarðborunum á Filippseyjum. „40% starfsfólksins fljúga hingað til að vinna. Þar af er helmingur Íslendingar. Þetta er eins og að vera á sjó, menn koma og vinna í mánuð og fara svo heim í mánuð.“

Aðspurður segir Egill að samningur Jarðborana sé til eins árs með möguleika á framlengingu. „Maður finnur að það er mikil eftirspurn eftir þessari þjónustu og ég vona að við eigum eftir að vera hér áfram í einhvern tíma. Þetta eru þannig tæki að þú grípur þau ekki ofan af hillu í næstu byggingavöruverslun. Við erum því eftirsóttir hér eins og staðan er núna. Verkkaupinn heitir EDC, Energy Development Corporation, stærsti framleiðandi jarðhitarafmagns í landinu,“ segir Egill að lokum.