Eyrir með 62 milljarða í JBT Marel

Samkvæmt tilkynningu eru mikil tímamót hjá Eyri Invest og hluthöfum þess. Ástæðan sé farsæll samruni Marel og JBT.

Eyrir er nú einn stærsti hluthafi sameinaðs félags með 6,6% eignarhlut. Ítrekað er í tilkynningu að Eyrir sé nú skuldlaust félag og hafi gert upp við alla lánveitendur.

Eyrir var kjölfestufjárfestir í Marel frá árinu 2005 og í dag samanstendur hluthafahópur Eyris af fjársterkum einstaklingum og stofnanafjárfestum.

Um 90% af eignum félagsins eru hlutabréf í JBT Marel.

Í tilkynningu er haft eftir Friðrik Jóhannssyni, stjórnarformanni Eyris: „Þetta eru spennandi tímamót fyrir Eyri Invest, Marel og JBT. Við erum stolt af því að hafa tekið þátt í þessari einstöku vegferð sem hefur skilað þessari farsælu niðurstöðu og við hlökkum til að fylgjast með framtíð þessa öfluga félags.“

Miðað við virði félagsins á markaði nú sem er um 940 milljarðar þá er eignarhlutur Eyris metinn á um 62 milljarða. 

• Blogga um frétt