Forstjóraskipti hjá Frumherja

Orri Hlöðversson hefur látið af störfum sem forstjóri Frumherja en hann hefur stýrt félaginu frá miðju ári 2006. Við starfi forstjóra tekur Jóhann Geir Harðarson sem hefur sinnt starfi framkvæmdastjóra fjármálasviðs Frumherja síðan árið 2020.

Þar á undan starfaði Jóhann við endurskoðun og fjármálaráðgjöf í tvo áratugi.

Þetta segir í tilkynningu frá Frumherja.

Tekur við stjórnarformennsku

Orri mun nú taka við stjórnarformennsku hjá félaginu en hann er einn af eigendum Frumherja.

„Undanfarin ár hefur átt sér stað umbreyting á félaginu sem skotið hefur styrkum stoðum undir reksturinn og aukið stöðugleika. Um leið hafa opnast ný tækifæri til að sækja fram og ég tel við hæfi að nýr stjórnandi stígi inn núna og leiði félagið til frekari sóknar. Ég hef fulla trú á að Jóhann sé rétti maðurinn í starfið enda hefur hann sýnt á undanförnum árum að hann hafi þá þekkingu, reynslu og mannkosti sem til þarf“, er haft eftir Orra.

• Blogga um frétt