„Það gekk ljómandi vel. Við vorum heppnir með veður og fengum ágætan afla í túrnum. Ufsinn gaf sig til og uppistaða aflans er ufsi og svo erum við með tegundir eins og þorsk og karfa,“ segir Heimir Guðbjörnsson, skipstjóri á ísfisktogaranum Helgu Maríu AK.
„Við byrjuðum túrinn efst í Skerjadjúpinu og þar fengum við ufsa. Næst lá leiðin á Fjöllin og þar var ufsi í takmörkuðu magni í bland við karfa. Við fórum svo í Víkurálinn og lukum við að taka karfaskammtinn en þar var einnig ufsi. Við fylgdum síðan kantinum norðaustur eftir og fengum ágætan þorskafla.“
Haft er eftir Heimi á vef HB Granda að það hafi fyrst verið þegar komið var norður á Þverálshornið að ufsaveiðin hafi glæðst fyrir alvöru. Er rætt var við hann í dag var togarinn staddur úti af Dýrafirði, á leið til Reykjavíkur með tæplega 170 tonna afla.
Hefja löndun klukkan sex í fyrramálið
„Við fengum fína ufsaveiði á Þverálshorninu og í gær og í nótt kom bara ufsi í trollið. Þetta var allt saman fínasti ufsi eða um tvö kíló að jafnaði og það var ekki fyrr en í morgun að það tók að bera á þorski sem meðafla. Hann var þó ekki meiri en svo að að hann passaði nákvæmlega upp á þau tæplega fjögur tonn sem okkur vantaði til að ná þorskskammti veiðiferðarinnar,“ segir Heimir en í máli hans kemur fram að alls staðar á Vestfjarðamiðum verði menn varir við loðnu. Hún sé ýmist ánetjuð í trollpokanum eða þá vart verði við hana í fisknum sem þarna veiðist.
Heimir segist búast við því að koma til Reykjavíkur seint í nótt en áformað er að hefja löndun klukkan sex í fyrramálið. Gangi það eftir verður togarinn klár fyrir næstu veiðiferð í hádeginu á föstudag.