„Hljóta að vera ánægðir með þessa byrjun“

Kolmunnaveiðin fer vel af stað í færeysku lögsögunni. Bjarni Ólafsson fékk 580 tonn í fyrsta holi en togað var í 13 tíma. Hákon EA fékk um 500 tonn eftir 16 tíma og Börkur NK fékk 600 tonn eftir 15 tíma, að því er fram kemur á vef Síldarvinnslunnar.

Segir þar að um sé að ræða fínustu veiði og að það taki væntanlega ekki langan tíma að fá í skipin ef framhald verði á henni.

„Þetta byrjar vel og heldur fyrr en í fyrra. Þá voru fyrstu bátar að byrja að toga 9. og 10. apríl. Fyrsta skipið á miðin núna var Hoffell SU og þeir fylltu í fjórum holum og lögðu af stað í land í nótt,“ sagði Hjörvar Hjálmarsson, skipstjóri á Berki, eftir hádegið í gær.

„Við vorum að klára að dæla úr öðru holinu okkar, togað var í 12 tíma og það gaf 460 tonn þannig að við erum komnir með tæp 1.100 tonn. Það er ekkert sérstaklega mikið að sjá hérna, en það er ágætislíf á kafla og það gefur vel í trollið. Menn hljóta að vera ánægðir með þessa byrjun á veiðunum.“

• Blogga um frétt