Skipulagsstofnun hefur gefið álit sitt um mat á umhverfisáhrifum allt að 20.800 tonna framleiðslu á laxi í Berufirði og Fáskrúðsfirði. Telur stofnunin að helstu neikvæðu áhrif fyrirhugaðs laxeldis séu á ástand sjávar og botndýralíf, auk aukinnar hættu á að fisksjúkdómar og laxalús berist í villta laxfiska og mögulegrar erfðablöndunar.
Þetta kemur fram í áliti sem stofnunin gerði opinbert síðdegis í dag, en um er að ræða áform fyrirtækisins Fiskeldis Austfjarða. Segir í áliti stofnunarinnar að hún telji að fyrirhugað eldi muni koma til með að hafa neikvæð samlegðaráhrif með fyrirhuguðu eldi Laxa fiskeldis í Fáskrúðsfirði.
Eldið muni þá einnig hafa neikvæð samlegðaráhrif með öðru fyrirhuguðu eldi á Austfjörðum á villta laxastofna með tilliti til erfðablöndunar, villta laxfiska með tilliti til laxalúsar, og á landslag og ásýnd.
Sérstaklega styrktar kvíar
Í mati sem fyrirtækið gaf út í október kom fram að fyrirhugað væri að laxinn yrði ræktaður í „mjög öflugum“ sjókvíum, en þær eru 50 metrar í þvermál og 160 metrar að ummáli. Þær eru að sögn hannaðar til að þola úthafsöldu betur og um leið hagstæðari í rekstri en smærri kvíar. Fiskurinn þrífist einnig betur.
„Eldiskvíarnar eru sérstaklega styrktar til að þola allt að 5 metra ölduhæð og ísingu,“ segir í matinu.
Kvíarnar verða samtals 24 fyrir hvern seiðaárgang og 10 til 20 kvíar verða festar saman í þyrpingu.
„Eldisnótin verður 20 m djúp og er rými nótar 45 þúsund rúmmetrar.“
Í mati fyrirtækisins kemur fram að öll áhrif á framkvæmdatíma séu metin afturkræf. „Rekstur fiskeldisins er hugsaður til ótilgreindrar framtíðar og áhrif vara á meðan honum stendur.“