Hafrannsóknastofnun ráðleggur að ekki verði veitt meira af humri á þessu ári en sem nemur 235 tonnum, eða aðeins rétt rúmlega 20% af veiðiráðgjöf síðasta fiskveiðiárs, og aðeins rúmlega 11% af ráðgjöf fiskveiðiársins 2010/2011.

Stofnunin leggur enn fremur til að veiðar með fiskibotnvörpu verði bannaðar á afmörkuðum svæðum í Breiðamerkurdjúpi, Hornafjarðardjúpi og Lónsdjúpi, til að minnka álag á humarslóð.

Þetta kemur fram í tilkynningu á vef stofnunarinnar. Jafnframt leggur stofnunin til að allar humarveiðar verði bannaðar í Jökuldjúpi og Lónsdjúpi til verndar uppvaxandi humri.

Bent er á að stofnstærð humars í stofnmælingu hafi lækkað um 20% frá árinu 2016. Á sama tíma hafi veiðihlutfall minnkað úr 1,9% árið 2016 í 1,2% árið 2018.

Minnsti afli frá upphafi veiða

Fyrirliggjandi gögn bendi til þess að nýliðun sé í sögulegu lágmarki og að árgangar frá 2005 séu mjög litlir. Verði ekki breyting þar á megi búast við áframhaldandi minnkun stofnsins.

Afli tvöfaldaðist frá árinu 2004 til ársins 2010 þegar hann náði 2500 tonnum. Síðan hefur aflinn minnkað og var 728 tonn árið 2018, sem er minnsti afli frá upphafi veiða árið 1957. Sókn í stofninn hefur verið nokkuð stöðug frá árinu 2009 en afli á sóknareiningu er nú í sögulegu lágmarki. Útgefið aflamark hefur ekki náðst síðustu tvö fiskveiðiár.

Sumarið 2018 hafi veiðst smár humar í Breiðamerkurdjúpi sem reynst hafi vera stórvaxin kvendýr en ekki séu merki um aukna nýliðun. Hlutfall kvendýra sé þá mjög lágt í humarveiðum við Ísland samanborið við önnur hafsvæði.

Sjá á vef stofnunarinnar.

Tengdar fréttir

Humarveiðar

Humarveiðarnar voru skemmtilegt tímabil

• Ráðleggja áframhaldandi humarveiðibann
• „Við höfum ekkert gaman af svartsýni“
• Tilkynna vísbendingar um vaxandi stofn humars
• Humarinn mjög kresinn á búsvæði

» Fleiri tengdar fréttir

• Blogga um frétt