Sviptir tvö skip veiðileyfi

Fiskistofa hefur svipt tvö skip veiðileyfi vegna vanskila á afladagbókum fyrir nóvembermánuð á síðasta ári. Þetta kemur fram á vef stofnunarinnar.

Sviptingin er gerð á grundvelli laga nr. 116/2006 um stjórn fiskveiða, en í 1. málsgrein 17. greinar þeirra er kveðið á um að skipstjórnarmenn veiðiskipa, sem hljóti veiðileyfi í atvinnuskyni, skuli halda sérstakar afladagbækur.

Samkvæmt lögunum á Fiskistofa að svipta skip leyfi til veiða í atvinnuskyni vegna vanskila á afladagbókum. Skal leyfissvipting standa þar til skil hafa verið gerð eða skýringar hafa verið gefnar á ástæðum vanskila, að því er segir í ákvæði 17. greinar laganna.

Skipin sem svipt hafa verið veiðileyfi að þessu sinni eru Neisti HU-5, í eigu útgerðarinnar Sigga afa ehf. í Mosfellsbæ, og Tóti NS-36, sem gerður er út af Grönvold ehf. á Vopnafirði.

• Blogga um frétt