„Krafturinn mætti vera dálítið meiri“

„Það hefur verið góð veiði en ekki aðgæsluveiði eins og undanfarin ár. Hins vegar er alltaf fiskur að bætast við það sem fyrir er. Ýsan er til dæmis ekki komin að neinu ráði en í fyrra hófst ýsuveiði fyrst í lok mars,“ segir Birgir Þór Sverrisson, skipstjóri á Vestmannaey VE.

Haft er eftir Birgi á vef Síldarvinnslunnar að honum finnist vanta meiri kraft í vertíðina í Vestmannaeyjum. Hann telur að fiskgengdin sé ekki jafn mikil við Eyjarnar og verið hefur síðustu ár.

„Undanfarin ár hefur fiskurinn gengið á miðin mjög snemma en hins vegar var ekkert óalgengt hér áður að vertíð hæfist um miðjan mars. Við höfum gjarnan verið úti í um tvo sólarhringa að undanförnu en þrálátar brælur hafa truflað veiðarnar verulega.“

Skipið fór út til veiða á sunnudag og kom inn til hafnar um hádegi í fyrradag.

„Aflinn var um 75 tonn sem er bara mjög gott. Almennt má því segja að vertíð sé í fullum gangi en miðað við síðustu ár mætti krafturinn í henni vera dálítið meiri.“

• Blogga um frétt