Tæknin flýgur fram úr þorskinum
Setja bókamerki
Staða margra þeirra tæknifyrirtækja sem tengjast sjávarútvegi hefur aldrei verið jafn sterk og nú. Þetta sýnir ný greining Íslenska sjávarklasans, sem gefin var út í vikunni.
Í greiningunni er bent á að tíu stærstu tæknifyrirtækin hafi aukið veltu sína umtalsvert á milli ára. Velta þeirra sem tengist sjávarútvegi og fiskeldi hafi þannig numið um 42 milljörðum króna á síðasta ári. Skýringar á því sé meðal annars að finna í sölu búnaðar og í samrunum við önnur fyrirtæki.
Velta annarra fyrirtækja í sama geira, sem samkvæmt athugun Sjávarklasans eru um 65 talsins, var þá um 40 milljarðar og óx um 7% á árinu 2018.
Því megi segja að síðasta ár sé það fyrsta í sögunni þar sem sala tæknibúnaðar og annars búnaðar frá íslenskum fyrirtækjum, sem mestmegnis er á erlenda markaði, sé meiri en sem nemur sölu á þorskflökum frá Íslandi.
„Fleiri tæknifyrirtæki eru að stækka umtalsvert og ná öflugri fótfestu á erlendum mörkuðum. Þrátt fyrir harða samkeppni hafa mörg minni fyrirtækin haldið vel sínum hlut og í sumum tilfellum vel það,“ segir í greiningu klasans.
Í fáum útflutningsgreinum hafi fyrirtæki nýtt jafn vel þau tækifæri sem felist í fjórðu iðnbyltingunni og þeirri sjálfvirknivæðingu sem hún hefur í för með sér. „Þá eru að koma fram ný tæknifyrirtæki, m.a. í rekjanleika, DNA-greiningum og umhverfisstjórnun sem enn bæta þá fjölbreyttu flóru tæknifyrirtækja sem starfrækt eru á þessu sviði hérlendis,“ segir í greiningunni.
Langstærst þessara fyrirtækja er Marel. Þar á eftir fylgja Skaginn 3X, Héðinn, Valka, Vaki, Curio, Naustmarine, Rafeyri og Samey. Samkvæmt niðurstöðum greiningarinnar eru þessi fyrirtæki samtals með tæplega 1.000 starfsmenn og starfa 80% þeirra á Íslandi.
Vakin er athygli á að stóru og meðalstóru tæknifyrirtækjunum hafi fjölgað. Þau hafi einnig haft mun meira svigrúm en þau minni til að markaðssetja þjónustu sína og vörur erlendis. Á síðastliðnum árum hafi það tekist afar vel.
Ítarlegri umfjöllun er að finna í ViðskiptaMogganum, sem fylgdi Morgunblaðinu á miðvikudag.
Segja KÍ hafa leitt skólakerfið í öngstræti
Ávinna sér réttindi þrátt fyrir flutninga
Brotin eftir greiningarferlið
Hver var hvati Crooks?
Biden dregur framboð sitt til baka
Joe Biden: Slakur námsmaður sem varð forseti