Pútín gangsetti íslenskan tæknibúnað
Setja bókamerki
/frimg/1/52/77/1527764.jpg)
Vladimír Pútín, forseti Rússlands, ræsti uppsjávarverksmiðju fyrir rússneska útgerðar- og fiskvinnslufyrirtækið Gidrostroy á Eastern Economic Forum-ráðstefnunni í Vladivostok í gær.
Íslensku tæknifyrirtækin Skaginn 3X, Frost og Rafeyri hafa sett upp tæknibúnað í verksmiðjunni, sem staðsett er á Shikotan-eyju við austurströnd Rússlands, að því er fram kemur í fréttatilkynningu frá Skaganum 3X.
Þá segir í tilkynningunni að fyrirtækin hafi undirritað samning um uppsetninguna á síðasta ári og að virði samningsins hlaupi á milljörðum íslenskra króna. Jafnframt er bent á að verksmiðjan sem um ræðir „er búin heildarlausnum frá fyrirtækjunum þremur til að flokka, pakka og frysta 900 tonn af uppsjávarfiski á sólarhring“.
Þekking á vinnslu uppsjávarfisks
„Við hjá Skaganum 3X erum einstaklega stolt af verksmiðjunni og þakklát fyrir tækifærið til þess að taka þátt í nútímavæðingu rússneska sjávarútvegsins,“ er haft eftir Pétri Jakobi Péturssyni, sölustjóra Skagans 3X í Rússlandi.
„Íslenskur sjávarútvegur er sjálfbær og einn sá tæknivæddasti í veröldinni. Okkur hefur tekist að einblína á gæði vörunnar og þar af leiðandi fengið hærra verð fyrir minni heildarafla. Tækni og sjálfvirkni hefur spilað stórt hlutverk og stuðlað að eftirspurn eftir íslenskri þekkingu og lausnum,“ segir Pétur Jakob.
Fram kemur í tilkynningunni að Skaginn 3X sérhæfi sig í vinnslu á uppsjávarfiski og er bent á að fyrirtækið hafi meðal annars hannað og sett upp búnað með afkastagetu allt að 1.300 tonn á sólarhring fyrir færeyska félagið Varðin Pelagic. En færeyska verksmiðjan er sögð sú stærsta sinnar tegundar í heiminum.
Eastern Economic Forum er vettvangur Rússa til þess að kynna landið og stuðla að erlendri fjárfestingu. Eigandi Gidrostroy-sjávarútvegsfyrirtækisins Alexander Verkhovskiy var viðstaddur þegar Pútín ræsti verksmiðjuna á þriðja degi ráðstefnunnar, sem hófst á mánudaginn.
„Við erum ekki í neinu stríði við kennara“
„Við treystum því að þetta muni fara vel“
Inga Sæland, eineltið og lögin í landinu
Áhyggjuefni ef gos hefst í vondu veðri
Stefna á úrslitatilraun til að höggva á hnútinn
Gul viðvörun um allt land alla helgina
Orkukostnaður sligar garðyrkjuna
Kínverski drekinn sýnir klærnar