Brim hf. hefur undirritað samning við Marel um kaup og uppsetningu á hátækni vinnslubúnaði og hugbúnaði fyrir hvítfiskvinnslu sem munu gera aðstöðu félagsins á Norðurgarði í Reykjavík að fullkomnustu vinnslustöð fyrir bolfisk á heimsvísu, að því er fram kemur í tilkynningu frá Marel.

Í henni segir að áætlað sé að nýja vinnslukerfið verði sett upp um mitt ár 2020. „Kerfið felur í sér ýmsar nýjungar, þar á meðal öflugt gæðaeftirlitskerfi og nýjustu róbótatækni sem mun sjálfvirknivæða og straumlínulaga vinnsluna til muna.“

Í ítarlegu viðtali við Guðmund Kristjánsson, forstjóra Brim, í ViðskiptaMogganum á morgun verður fjallað um umfangsmiklar breytingar í rekstri Brim á næstu misserum.

Frétt af mbl.is

Brim kaupir útgerð og vinnslu fyrir 3 milljarða

Sýndarveruleiki við þjálfun

Marel kynnti lausnina fyrir stjórnendum Brim í sýndarveruleika vikuna áður en kaupin voru undirrituð. „Í tölvuhermiveröld gátu forsvarsmenn Brim gengið eftir öllum stigum vinnslunnar. Sú innsýn nýtist stjórnendum við skipulagningu. Þjálfun starfsfólks mun einnig fara fram í sýndarveruleika þannig að vinnsla getur hafist strax að uppsetningu lokinni.“ Er þjálfunin þannig gerð að starfsfólk Brims mun geta starfrækt búnaðinn frá fyrsta degi.

Marel kveðst nota sýndarverkuleika í auknum mæli, bæði við framleiðslu og sölu og jafnframt til þess að hraða þróunarferlinu og draga úr kostnaði við uppsetningar fyrir viðskiptavini.

Hátæknivélar

Fram kemur í tilkynningunni að Brim hefur meðal annars fest kaup á háþróuðu pökkunarkerfi með tíu róbótahausum sem mun straumlínulaga allt pökkunarferlið. „Jafnframt felur vinnslukerfið í sér þrjár FleXicut vatnsskurðarvélar ásamt tilheyrandi forsnyrtilínum og sjálfvirkri afurða dreifingu, auk þess sem Brim verður fyrst til að innleiða nýtt SensorX beinaleitarkerfi fyrir ferskar afurðir.“ Þá mun hugbúnaður gegna mikilvægu hlutverki í nýja vinnslukerfinu, þar sem hann tengir tækin í hverju vinnsluþrepi hvert við annað og tryggir jafnframt rekjanleika gegnum allt vinnsluferlið.

Hátækni samtenging búnaðarins gerir hann snjallan sem auðveldar Brim að mæta óskum og pöntunum viðskiptavina fljótt og nákvæmlega og um leið fullnýta verðmætt hráefni, segir í fréttatilkynningunni.

Frétt af mbl.is

Nýta röntgentækni við vatnsskurð

Tengdar fréttir

Nýsköpun og tækni í sjávarútvegi

Hefring hlaut Sigölduna

• Leita húsnæðis undir frumkvöðlasetur
• Fjárfesta 332 milljónum í Hefring
• Frumkvöðlar bláa hagkerfisins kynna nýsköpun
• Hugmyndafræði Sjávarklasans víða eftirsótt

» Fleiri tengdar fréttir

Brim

Stærsta skip flotans heitir nú Þerney

• Brim fjárfesir í vistvænum krapavélum
• Stjórn Brims helst óbreytt
• Hagnaður Brims dróst saman um 20%
• Brim seldi nýkeypt skip vegna veiðibanns

» Fleiri tengdar fréttir

• Blogga um frétt