Hlé gert á kolmunnaveiðum

Öll kolmunnaskip sem landa hjá Síldarvinnslunni eru komin til hafnar eftir að hafa verið á miðunum vestur af Írlandi. Þá verður gert hlé á veiðum fram undir páska og munu síðan veiðar hefjast á ný suður af Færeyjum, að því er segir á vef Síldarvinnslunnar.

Þar segir að Bjarni Ólafsson AK hafi komið til Neskaupstaðar á föstudag með 1.200 tonn, Börkur NK á sunnudag með 2.200 tonn og Beitir NK á mánudag með 1.750 tonn.

Haft er eftir Hafþóri Eiríkssyni, verksmiðjustjóra í Neskaupstað, að vinnsla á kolmunnanum hafi gengið afar vel. Úr honum fæst gott mjöl  og eitthvað lýsi, en lýsið í fiskinum hefur farið minnkandi enda sé hann að horast mjög á þessum tíma.

• Blogga um frétt