„Það er blíða eins og er, en fiskiríið mætti vera betra“ segir Sigurður Á. Samúelsson, skipstjóri á Sóleyju Sigurjóns GK 200, í samtali við 200 mílur spurður um stöðuna á miðunum, en skipið er á rækjuveiðum norður af Grímsey. „Við erum á rækju þrjá til fjóra mánuði á ári og höfum verið það undanfarin ár,“ útskýrir hann.

„Þetta hefur farið hnignandi og tala nú ekki um þegar búið er að breyta reglugerð í sambandi við pokann. Í stað þess að vera með venjulegan poka þá erum við með fjögurra byrða þvernetspoka sem þýðir að möskvarnir eru galopnir og það síast allt út,“ útskýrir Sigurður.

„Þetta var sett á án samráðs við einn eða neinn, þetta var gert í einhverju fumi. Þeir voru með einhverjar rannsóknir úr Ísafjarðadjúpi sem er ekki hægt að heimfæra á úthafið,“ fullyrðir skipstjórinn. „Það þýðir samt ekkert að vera að væla yfir þessu,“ bætir hann við og skellir upp úr.

Veiða meira með tvö troll en lengi dregið

Hann segir þó áhöfnina sátta við það að skipið sé þannig útbúið að það getur veitt betur en flest önnur. „Við höfum eiginlega vinninginn. Við höfum tvö troll sem við drögum. Það munar um það. Við erum að fá um það bil einn þriðja upp í helmingi meira en með eitt svona öllu jöfnu, þó það sé ekki algilt en það skiptir sköpum.“

Það þarf að draga í allt að hálfan sólarhring. Mynd úr safni. mbl.is/Þorgeir Baldursson

Þó nokkur bið er þegar rækjuveiðarnar eru annars vegar, að sögn skipstjórans. „Það er lengi dregið. Þetta eru tíu tímar upp í hálfan sólarhring.“

Lítið um fisk

Sigurður segir aðeins minna af fiski á svæðinu nú en verið hefur „Fiskurinn er seinni að ganga úr fjörunum heldur en undanfarin ár. Fjörurnar eru stappfullar af fiski.“

Spurður hvort hann hefði frekar viljað vera á strandveiðum þar sem fjörurnar eru fullar af fiski, svarar Sigurður því neitandi. „Ég búinn að prófa þetta ævintýri og það er engin rómantík yfir þessu,“ segir hann og hlær.

Tengdar fréttir

Rækjuveiðar

Óbreytt ráðgjöf rækju við Snæfellsnes

• Leggja til engar veiðar á rækju í Djúpinu
• Lækka rækjuráðgjöf en aldrei meiri ýsa á svæðinu
• „Það er búin að vera mokveiði“
• Leggja til minni veiði úthafsrækju

» Fleiri tengdar fréttir

• Blogga um frétt