Formaður samninganefndar Sjómannafélags Íslands, Jónas Garðarsson, segir að þrátt fyrir að boðist hafi verið til þess að fresta aðgerðum um borð í Herjólfi hafi opinbert hlutfélag um rekstur ferjunnar slegið á útrétta hönd fólksins sem bauðst til að fjölga um aðeins eina þernu og fresta verkfalli til að ná sáttum.

Verkfall Sjómannafélags Íslands hófst síðastliðinn þriðjudag og stóð í sólarhring. Næsta verkfall verður næstkomandi þriðjudag 14. júlí og stendur í 2 sólarhringa. Þriðja verkfall verður þriðjudaginn 21. júlí og stendur í 3 sólarhringa.

„Þrátt fyrir að Sjómannafélag Íslands fyrir hönd háseta og þerna um borð í Vestmannaeyjaferjunni Herjólfi hafi boðist til að fresta aðgerðum, þá hefur hið opinbera hlutafélag sem rekur Herjólf slegið á útrétta hönd fólksins sem bauðst til að fjölga um aðeins eina þernu og fresta verkfalli til að ná sáttum. Á þá sáttarhönd var slegið.

Nú eru þrjár þernur á vakt á Herjólfi en voru jafnan fimm á vakt yfir hásumarið hjá Eimskip og Samskip sem áður ráku Herjólf. Það má með ólíkindum telja, að Bæjarútgerð Eyjanna undir forystu Írisar Róbertsdóttur bæjarstýru, gangi svo freklega á rétt þerna og háseta. Íris heldur um hlutabréf Herjólfs ohf. Hún ásamt stjórn Herjólfs og framkvæmdastjóra ber ábyrgð á ofríki gegn hásetum og þernum á Herjólfi.

Í desember 2018 lýsti Sjómannafélag Íslands því yfir að vinnufyrirkomulag þerna og háseta um borð í nýjum Herjólfi væri ekki með þeim hætti sem þau sættu sig við. Þeim er gert að vinna þrjár helgar af hverjum fjórum í mánuði ásamt öllum hátíðisdögum. Þessar kröfur lágu fyrir áður en hin opinbera Bæjarútgerð var stofnuð. Sjómannafélagið fór fram fram á viðræður. Bréfum, símtölum og sms-boðum Sjómannafélagsins var ekki svarað. Deilunni var því vísað til Ríkissáttasemjara í febrúar 2020.

Um þverbak keyrði í þvergirðingshætti og virðingaleysi stjórnar Herjólfs ohf. gagnvart fólkinu, þegar samið var við Sjómannafélagið Jötun um kjör að „skapi“ bæjaryfirvalda. Þessi bolabrögð stjórnar Herjólfs voru sem blaut tuska í andlit þerna og háseta. Vestmannaeyjabær viðhefur vinnubrögð sem tíðkuðust á dögum Kreppunnar miklu og brýtur áratuga samskiptareglur á vinnumarkaði.  Jötunn er með tvo félagsmenn á Herjólfi á móti 20 félagsmönnum Sjómannafélagsins og bæjarútgerðin krefst þess að Jötuns-samningurinn gildi fyrir alla.  Stjórn Herjólfs leitaði til Samtaka atvinnulífsins um að höfða mál fyrir Félagsdómi til að fá verkfallið dæmt ólöglegt. SA og bærinn koltöpuðu málinu. Það var mikil sneypuför.

Það er mikilvægt að Eyjamenn og ferðaþjónustan í Eyjum átti sig á yfirgangi bæjaryfirvalda. Það er mikilvægt að landsmenn átti sig á að verið er að beita fólkið á Herjólfi ofríki og fádæma hroka sem ekki hefur þekkst í verkalýðsbaráttu í áratugi. Bæjaryfirvöld ástunda vinnubrögð sem fyrirtæki taka ekki í mál. Meðan verið er að minnka vinnuálag og stytta vinnutíma starfsstétta í landinu þá fara bæjaryfirvöld í Eyjum í þveröfuga átt þegar kemur að hásetum og þernum á Herjólfi,“ segir í yfirlýsingu frá samninganefnd Sjómannafélags Íslands.

Formaður samninganefndar Sjómannafélags Íslands, Jónas Garðarsson. mbl.is/Hari

Tengdar fréttir

Kjaramál sjómanna

„Þetta er hrein og klár misnotkun“

• Sjómönnum tryggt 54% meira fyrir þorskinn
• „Er þetta réttlát skipting?“
• „Nóg er komið af rugli og misskilningi“
• Níu ára stöðugleikaskeið í kjaramálum sjómanna

» Fleiri tengdar fréttir

Herjólfur

Gamli Herjólfur rétt ókominn til Eyja frá Færeyjum

• Herjólfur fer í slipp og sá gamli mun taka við
• „Mjög alvarleg bilun“
• Nýr samningur gerður um Herjólf
• Telur aðbúnað við Herjólf vítaverðan

» Fleiri tengdar fréttir

• Blogga um frétt