Samherji hefur fest kaup á uppsjávarskipi sem til stendur að breyta fyrir bolfiskveiðar. Hægt verður að dæla fiski um borð og geyma hann lifandi í sérútbúnum tönkum, sem er nýjung, að því er kemur fram í tilkynningu.

Fyrirkomulagið býður upp á mun meiri sveigjanleika í meðferð aflans og betri stýringu vinnuálags um borð og í landi. Um borð býður þessi aðferð upp á að:

• Fiskur fer í sér útbúna tanka þar sem honum er haldið lifandi. Þá er hægt að vinna hann síðar um borð eða koma með fiskinn lifandi að landi.
• Fiskur er blóðgaður/slægður og settur í tanka með kældum sjó (RSW) til geymslu.
• Fiskur er blóðgaður/slægður í hefðbundin kör sem geymd eru í kældri fiskilest.

Aðferðin felst í því að fiskur er veiddur í hefðbundna botnvörpu. Í staðinn fyrir að taka poka inn á dekk og sturta úr honum sem veldur miklu álagi á fiskinn, þá er pokinn tekinn á síðuna og aflanum dælt um borð með sogdælukerfi (vacuum). Þetta fer mun betur með aflann og er þessi aðferð vel þekkt úr laxeldisiðnaðinum við tilfærslu á lifandi fiski, að því er kemur fram í tilkynningunni.

Frá löndun á lifandi fiski í Noregi. Ljósmynd/Aðsend

Þar kemur einnig fram að Norðmenn hafi stundað þessar veiðar í töluverðum mæli síðustu ár og byggt upp regluverk í kringum þær. Þar sé miðað við að sé fiski haldið lifandi skemur en 12 vikur þurfi ekki að meðhöndla hann sem eldisfisk, því ekki sé um eiginlegt fiskeldi að ræða heldur eingöngu geymsluform.

„Þetta fyrirkomulag á veiðum hefur ekki tíðkast hér á landi og regluverkið því ekki til staðar. Slíkt regluverk snýr meðal annars að vigtun og geymslu lifandi afla. Okkar sýn er er að í framtíðinni verði skip almennt útbúin þannig að þau geti komið með hluta aflans lifandi að landi. Til þess að sú þróun geti átt sér stað, er nauðsynlegt að reglugerðum verði breytt og þær aðlagaðar þannig að sjávarútveginum verði gert kleift að þróast í þessa átt," segir í tilkynningunni. 

„Nauðsynlegt er að sjávarútvegurinn og stjórnvöld fari í samstarf við að byggja upp regluverk til að halda utan um slíkar veiðar og stuðla þannig að bættri dýravelferð og verðmætaaukningu í bolfiskvinnslu. Samherji mun nýta nýja skipið sem prófstein á þessar veiðar í þeirri trú að hægt verði að eiga gott samtal við stjórnvöld.“

Tengdar fréttir

Samherji

Sumarstarfsmenn gegna lykilhlutverki hjá ÚA

• Björgvin kominn til Spánar
• Hagnaður Samherja minnkaði eftir uppstokkun
• Mikilvægt að treysta viðskiptasamböndin
• Söfnuðu mottum og hálfri milljón

» Fleiri tengdar fréttir

Nýsköpun og tækni í sjávarútvegi

Fjárfesta 332 milljónum í Hefring

• Frumkvöðlar bláa hagkerfisins kynna nýsköpun
• Hugmyndafræði Sjávarklasans víða eftirsótt
• Rétt hugarfar hafi átt áhrif á heimsvísu
• Árangur Íslands skólabókardæmi um fullnýtingu

» Fleiri tengdar fréttir

• Blogga um frétt