Alls fengu fyrirtæki er tengjast haftengdri starfsemi rúmar 97 milljónir úr Orkusjóði vegna verkefna er tengjast orkuskiptum. Um er að ræða níu fyrirtæki en aðeins tvö þeirra eru sjávarútvegsfyrirtæki. Þá eru tvö fyrirtæki í fiskeldi, eitt er afurðastöð og síðustu fjögur þjónusta sjávarútveg.

Mest hlaut Síldarvinnslan hf. sem fékk 19,5 milljónir króna vegna landtengingar uppsjávarskipa. Verkefnið felur í sér að uppsjávarskip sem liggja við bryggju í Norðfjarðarhöfn geta tengst rafmagni sem nýtist til að kæla afla, dæla honum á land ásamt annarri raforkunotkun um borð. Síldarvinnslan hefur kostað þróun búnaðarins og er áætlað að ef öll uppsjávarskip sem landa í Neskaupstað tengjast rafmagni geti sparast um 300 þúsund lítrar af olíu á ári.

mbl.is

Næstmest hlaut Sæplast ehf. sem skipti út olíu fyrir rafmagn í framleiðsluvél sinni og hlaut fyrirtækið 18,4 milljónir króna.

Samanlagt voru veittar 27 milljónir í rafvæðingu fóðurpramma hjá laxeldisfyrirtækjunum Háafelli ehf. á Vestfjörðum og Löxum fiskeldi ehf. á Austfjörðum.

100 krónur á hvern lítra

Í heild var sótt um 1.468 milljónir króna í styrk til Orkusjóðs en til úthlutunar skv. auglýsingu voru 320 milljónir. Atvinnuvega- og nýsköpunarráðuneytið og umhverfis- og auðlindaráuneytið fjármögnuðu þá 150 milljónir til viðbótar og var því hægt að úthluta 470 milljónum.

„Við úthlutun styrkja Orkusjóðs árið 2021 voru umsóknir metnar út frá því hvort þau stuðli að raunverulegum orkuskiptum og minnki notkun jarðefnaeldsneytis með skilvirkum og hagkvæmum hætti, helst í matvælaframleiðslu. [...] Athyglisvert er að um 100 kr. styrkur á hvern olíulítra sem notaður er árlega nægir í mörgum tilfellum til að skipta olíunotkun alfarið út fyrir vistvæna orku,“ segir í skýrslu stjórnar Orkusjóðs vegna úthlutunar ársins.

Tengdar fréttir

Nýsköpun og tækni í sjávarútvegi

Hefring hlaut Sigölduna

• Leita húsnæðis undir frumkvöðlasetur
• Fjárfesta 332 milljónum í Hefring
• Frumkvöðlar bláa hagkerfisins kynna nýsköpun
• Hugmyndafræði Sjávarklasans víða eftirsótt

» Fleiri tengdar fréttir