Áhersla á bann við karfaveiðum á Reykjaneshrygg
Setja bókamerki
Fulltrúar íslenskra yfirvalda lögðu áherslu á að stöðva veiðar á karfa á Reykjaneshrygg á ársfundi Norðuraustur-Atlantshafsfiskveiðiráðsins (NEAFC) sem fram fór dagana 9. til 12. nóvember. Ástæðan er ráðgjöf frá Alþjóðahafrannsóknaráðinu (ICES) um að engar veiðar skyldu stundaðar sökum alvarlegs ástands stofnanna.
Þetta kemur fram í tilkynningu á vef stjórnarráðsins.
„Á ársfundinum 2020 náðist í fyrsta sinn að fá samþykkt veiðibann, en Rússar mótmæltu því og settu sér einhliða kvóta en Rússar viðurkenna ekki mat ICES á stöðu þessara karfastofna. ESB studdi ekki veiðibann á fundinum 2020 en mótmælti ekki niðurstöðunni og studdu nú áframhald veiðibannsins. Viðræður við Rússa um þetta mál munu halda áfram og var m.a. samþykkt á fundi NEAFC nú að óska eftir því að ICES skoði sérstaklega þau gögn sem Rússar byggja andstöðu sína á, í þeim tilgangi að komast nær sameiginlegri sýn á málefni karfa á Reykjaneshrygg,“ segir í tilkynningunni.
Lokað á uppsjávarveiðar annarra
Eins og fram hefur komið á 200 mílum tókst ekki á fundi strandríkja í london að komast að samkomulagi um skiptingu makríls, kolmunna og norsk-íslenskri síld. Af þessum ástæðum var ekki samþykkt annað á ársfundinum en að „ríkin skyldu setja sér takmarkanir og öðrum en aðildarríkjum væri óheimilt að veiða á stjórnunarsvæði NEAFC. Auk þessa voru samþykktar stjórnunarráðstafanir fyrir úthafið varðandi ýsu á Rockall banka, karfa í Síldarsmugunni og nokkra aðra fiskistofna.“
Þá var samþykkt að efla eftirlit á úthafinu og tillögur um að efla einnig upplýsingagjöf varðandi veiðar.
Jafnframt var samþykkt yfirlit yfir hvernig NEAFC hefur brugðist við því í sem beint er til svæðisbundinna fiskveiðistjórnunarstofnana í ályktunum Allsherjarþings Sameinuðu þjóðanna. Vakin er í tilkynningunni athygli á því að NEAFC er fyrsta stofnunin af þessum toga sem gerir slíka úttekt.
„NEAFC er leiðandi á heimsvísu í vernd viðkvæmra botnvistkerfa, svo sem kórala og svampa, og í stjórn veiða á djúpsjávartegundum. Á fundinum var m.a. ákveðið að framkvæma árið 2022 heildarendurskoðun á þeim svæðum sem lokuð eru til að vernda viðkvæm botnvistkerfi. Var samþykkt að biðja ICES um sérstaka ráðgjöf í þessu sambandi svo svæðalokanirnar byggi á bestu mögulegu vísindaráðgjöf,“ segir í tilkynningu stjórnarráðsins.
Fyrsta konan
Á síðasta ársfundi NEAFC var Janet Nørregaard frá Færeyjum kjörinn forseti og stjórnaði hún því sínum fyrsta ársfundi í fyrsta sinn. Er hún fyrsta konan sem stýrir ársfundi NEAFC.
NEAFC fer með stjórn fiskveiða utan lögsagna ríkja á Norðaustur-Atlantshafi. Aðilar að ráðinu eru Bretar, Danmörk (varðandi Færeyjar og Grænland), Evrópusambandið, Ísland, Noregur og Rússland. Stefán Ásmundsson, skrifstofustjóri í atvinnuvega- og nýsköpunarráðuneytinu, fór fyrir íslensku sendinefndinni á fundinum. Í sendinefndinni voru, auk fulltrúa atvinnuvega- og nýsköpunarráðuneytinu, fulltrúar utanríkisráðuneytisins, Fiskistofu, Hafrannsóknastofnunar, Landhelgisgæslunnar og Samtaka fyrirtækja í sjávarútvegi.
Vonast eftir breiðri þverpólitískri sátt
110 milljónir í stöðu prófessors
Frestar skerðingum fyrir norðan og austan
Illviðri gengur yfir landið í dag
Mjög dýrt að tryggja landamærin
Óeðlilegt að sama gjald verði tekið óháð þyngd