Sífellt fleiri konur til Landhelgisgæslunnar
Setja bókamerki
Hlutfall kvenna í starfsliði Landhelgisgæslu Íslands hefur aukist á undanförnum árum og eru mörg dæmi um þá þróun. Í síðasta mánuði urðu þau tímamót hjá stofnuninni að í fyrsta sinn var vakt í stjórnstöð eingöngu skipuð konum þegar þær Hallbjörg Erla Fjeldsted og Kristbjörg Hildur Guðmundsdóttir vöktuðu landið og miðin.
Ekki er um að ræða fyrstu tímamótin sem Hallbjörg Erla hefur átt þátt í en hún var fyrsta fastráðna konan í stjórnstöð Landhelgisgæslunnar frá stofnun 1951 auk þess sem hún varð í september í fyrra fyrsta konan til að gegna stöðu vakstjóra í stjórnstöð stofnunarinnar.
„Landhelgisgæslan hefur unnið markvisst að jöfnun kynjahlutfalla í allri starfsemi stofnunarinnar. Það er hins vegar svo að á meðan fleiri karlar sækja í tiltekin störf innan Landhelgisgæslunnar en konur verður eðli máls samkvæmt erfiðara um vik að jafna kynjahlutföll,“ segir í svari Ásgeirs Erlendssonar, upplýsingafulltrúa Landhelgisgæslunnar, við fyrirspurn blaðamanns um kynjaskiptingu starfsliðs stofnunarinnar.
Engin í séraðgerða- og sprengjudeild
„Það er þó ánægjulegt að segja frá því að jafnt hlutfall er milli kynja þegar kemur að stjórnendum kjarna- og stoðsviða. Jafnt kynjahlutfall er jafnframt í stjórnstöð Landhelgisgæslunnar á Keflavíkurflugvelli og sömuleiðis hefur hlutfall kvenna í stjórnstöð í Skógarhlíð farið hækkandi, en þær eru nú fjórar starfandi. Eins er gaman að segja frá því að af sjö vélstjórum í áhöfnum varðskipa eru tvær konur, auk þess sem konur eru og hafa verið í fleiri störfum um borð í varðskipunum,“ skrifar hann.
Fram kemur að konur séu starfandi í öllum deildum Landhelgisgæslunnar utan séraðgerða- og sprengjueyðingardeildar, en þar hefur engin kona sótt um starf.
„Í öllum auglýsingum eru áhugasamir, óháð kyni, hvattir til að sækja um. Landhelgisgæslan starfar eftir jafnréttisáætlun og hefur hlotið jafnlaunavottun. Árin 2020 og 2021 hlaut Landhelgisgæslan viðurkenningu Jafnvægisvogarinnar vegna jafns kynjahlutfalls í framkvæmdateymi stofnunarinnar,“ segir Ásgeir.
Íslenskar konur styðja vitnin í Noregi
Dularfullt skjáskot í síma látnu
Lenda í vanskilum vegna Þórkötlu
„Tilbúin til að takast á við gos í þessum mánuði“
Almennt ætti ekki að tjá sig á þessum nótum
Telur að Alfreð hafi verið í geðrofi
Borga milljónir í leigu í staðinn fyrir 750 þúsund