Litlar líkur á að kvótinn náist
Setja bókamerki
Tengdar fréttir
Loðnuveiðar
Eftir er að veiða hátt í þriðjung loðnukvótans upp á 686 þúsund tonn og telur Sigurgeir Brynjar Kristgeirsson, framkvæmdastjóri Vinnslustöðvarinnar í Vestmannaeyjum, litlar líkur á að sá afli náist. Komi ekki nýjar loðnugöngur séu ekki margir dagar eftir af vertíðinni.
Loðnuskipin voru flest á norðanverðum Faxaflóa í gær og byrjuðu að kasta upp úr hádegi þegar veður hafði gengið niður. Loðnan sem fengist hefur síðustu daga er komin nálægt hrygningu. Sigurgeir segir að útlit sé fyrir að menn nái ekki að veiða það sem hugsað var fyrir hrognavinnslu og það hafi umtalsvert tekjutap í för með sér.
„Það þarf mikið að breytast til að menn nái markmiðum sínum á vertíðinni,“ segir Sigurgeir. „Enn eina ferðina er vont veður fram undan og þessi vertíð hefur verið ein samfelld bræla. Flotinn er búinn að veiða yfir 460 þúsund tonn frá því í desember, en samt hefur allan tímann vantað þéttleika í göngurnar, sem hafa oftast verið dreifðar og slitnar í sundur. Ég veit ekki hvað hefur valdið því, en það er vitað að veðrið hefur áhrif.“
Ekki úrkula vonar
Sigurgeir segist þó ekki úrkula vonar um að vestanganga komi, loðna finnist fyrir Norðurlandi eða minni göngur komi með Suðurlandinu.
Spurður um möguleika á slíku segir hann að þessa dagana einbeiti menn sér að veiði á hefðbundnum slóðum eins og í Faxaflóa og Breiðafirði. Menn fari ekkert að leita meðan von sé um afla þar.
Vonast til að menn sjái alvöru málsins
Ætla ekki að skila peningnum
Ákvörðun Trumps veldur titringi
„Ég hef verið kjaftaskur mikill“
„Þetta er ógnvænleg staða“
Staðan alvarleg og stutt í aðgerðir
MDE: Brotið á Jóhannesi í BK-44 máli