Þverhyrna eða Lophodolos acanthognadus veiddist í fyrsta sinn í efnahagslögsögu Íslands í síðasta haustralli Hafrannsóknastofnunar. Greining sjaldgæfra tegunda getur tekið nokkurn tíma en að þessu sinni gat Jónbjörn Pálsson greint tegundina við fyrstu sýn.

Þetta er meðal þess sem fram kemur í tilkynningu á vef Hafrannsóknastofnunar.

Þar segir að þverhyrna tilheyri hyrnuætt af ættbálki kjaftagelgna en flestir fiskar þessa ættbálks eru djúpfiskar, ýmist botnfiskar eða botn- og miðsævisfiskar.

Fiskurinn vakti skiljanlega áhuga vísindamanna. Ljósmynd/Hafrannsóknastofnun

Algengt er að misalgengar tegundir veiðist í þeim hluta haustrallsins þar sem togað er á miklu dýpi. Í þetta sinn var togað á 1.400 metra dýpi. „Þegar togað er svona djúpt finnast fjölmargar tegundir sem eru lítt þekktar, þótt sumar séu nokkuð algengar. Einnig fást sjaldgæfar tegundir og sumar þeirra hafa fundist aðeins nokkrum sinnum á þeim 25 árum sem haustrallið hefur farið fram,“ segir í tilkynningunni.

Vakin er athygli á að sjaldgæfar tegundir sem veiðist í leiðöngrum Hafró séu frystar og skoðaðar nánar við betri aðstæður á rannsóknarstofu.

„Jónbjörn Pálsson hefur oft verið okkur innan handar við greiningar. Venjulega kostar þessi greiningarvinna þó nokkra yfirlegu en í þetta sinn þurfti Jónbjörn ekki annað en að berja fiskinn augum í nokkrar sekúndur til að þekkja tegundina. Kom þá upp úr dúrnum að þessi tegund hefur verið þeim Gunnari Jónssyni kunn í nokkurn tíma en hún hefur veiðst áður utan íslenskrar efnahagslögsögu, t.d. í leiðöngrum í Grænlandshafi. Í ár veiddist þverhyrna innan íslenskrar efnahagslögsögu og getur hún því hér með talist til íslenskrar fiskafánu,“ segir í tilkynningunni.

Þeir Jónbjörn og Gunnar eru báðir meðal höfunda bókarinnar Íslenskir fiskar.

Tengdar fréttir

Hafrannsóknastofnun

Héldu í 34 daga uppsjávarleiðangur

• Fátt kom á óvart
• Ráðgjöfin sögð æra óstöðugan
• Þorskstofninn fari hægt minnkandi
• Beint: Ráðgjöf Hafrannsóknastofnunar

» Fleiri tengdar fréttir

Furðufiskar

Óvæntur snigill frá N-Ameríku í Breiðafirði

• Landa sífellt meira af hinum ófríða snarphala
• Grannvaxinn og ófrýnilegur
• Var talin óæt og sögð hverfa við suðu
• Hámýs seint taldar til nytjastofna

» Fleiri tengdar fréttir

• Blogga um frétt