Eldi skilaði 75% útflutningsverðmæta

Norskir framleiðendur sjávarafurða seldu til erlendra kaupenda vörur fyrir 82,3 milljarða norskra króna á fyrsta árshelmingi, um er að ræða jafnvirði 1.079 milljarða íslenskra króna. Þar af fengust 61,2 milljarðar norskra króna eða tæp 75% útflutningsverðmætanna fyrir eldisafurðir.

Myndin er hins vegar önnur þegar litið er til magns og nam heildarmagn útfluttra sjávarafurða á fyrsta árshelmingi 1,31 milljón tonn. Skiluðu veiðar 760 þúsund tonnum og eldi 550 þúsund tonnum.

Þetta er meðal þess sem má lesa í samantekt norska útflutningsráðsins, Norges Sjømatråd.

Laxinn í yfirburðastöðu

Þar segir að útflutningsverðmæti norskra sjávarafurða hafi aukist um 12,3 milljarða frá fyrsta árshelmingi 2022 og sé aukningin því 18%. Hátt afurðaverð hafi vissuelga haft áhrif á þessa niðurstöðu en gera má ráð fyrir að átta milljarðar af aukningunni megi rekja til veikara gengi norsku krónunnar. Það er því aðeins um 35% af aukningunni sem má rekja beint til hærra afurðaverðs.

Á fyrstu sex mánuðum ársins 2023 skilaði eldislax 71,1% af útflutningsverðmætunum eða 58,5 milljörðum norskra króna. Þorskur skilaði aðeins 8,8% eða 7,27 milljörðum. Í magni var lax 523,8 þúsund tonn af heildarútflutningi sem gerir 39,9% af heildarútflutningi en flutt voru út 101 þúsund tonn af þorski.

• Blogga um frétt