Samfelld makrílvinnsla hefur verið í fiskiðjuveri Síldarvinnslunanr í Neskaupstað undanfarið. „Þetta er virkilega fallegur fiskur en oftast er töluverð áta í honum og það hefur áhrif á hvernig hann er unninn,“ segir Geir Sigurpáll Hlöðversson, rekstrarstjóri fiskiðjuversins, í færslu á vef útgerðarinnar.

„Nú erum við að flaka og hausa en það er ekki heilfryst vegna átunnar. Hafa verður í huga að við erum ávallt að fá nýveiddan fisk og bátarnir kæla aflann um borð þannig að hráefnið er virkilega gott. Það er ekki hægt að segja annað en að vertíðin hafi gengið vel hingað til og við getum ekki kvartað undan neinu,“ segir Geir Sigurpáll.

Geir Sigurpáll Hlöðversson, rekstrarstjóri fiskiðjuvers Síldarvinnslunnar. Ljósmynd/Síldarvinnslan

Síðastliðinn föstudag var lokið við að landa 1.100 tonnum af makríl úr Vilhelmi Þorsteinssyni EA, uppsjávarskipi Samherja, og var þá um leið Barði NK kominn að landi með 830 tonn. Aðfararnótt sunnudags hófst vinnsla á 1.400 tonna afla úr Berki NK og er gert ráð fyrir að Beitir NK komi til hafnar í kvöld með 1.440 tonn.

Í dag hefur verið unnið að því að koma 640 tonnum af frystum hausuðum makríl í frystigeymslur Síldarvinnslunnar úr Hákoni EA.

„Veiði hefur verið nokkuð misjöfn síðustu dagana en skipin hafa best verið að fá um 250 tonn í holi. Eins og áður á vertíðinni hefur veiðin farið fram innan íslenskrar lögsögu og það er svo sannarlega jákvætt,“ segir í færslunni.

Tengdar fréttir

Makrílveiðar

Ekki líkur á miklum makríl í lögsögunni í sumar

• Ræðir möguleika á komu makrílsins
• Munu reyna til hins ýtrasta að ná samkomulagi
• Samkomulag um ráðgjöf en ekki um veiði
• Leggja til 24% samdrátt í síldarkvóta

» Fleiri tengdar fréttir

• Blogga um frétt