Höfðu upp á makrílnum í Smugunni
Setja bókamerki
Skipamergð er nú í sunnanverðri Smugunni að veiða makríl. Skipin eru ekki aðeins íslensk, þar eru einnig fjöldi rússneskra og færeyskra skipa. Íslensku uppsjávarskipin höfðu í júlí fundið töluvert af makríl í íslenskri lögsögu rétt austur af landinu og voru á veiðum þar um nokkurt skeið enda stór og stæðilegur makríll að fá.
Í síðustu viku hættu íslensku skipin að finna makríl á sömu slóð og veitt hafði verið og hófst þá nokkur leit austur og norðaustur af landinu í átta að Smugunni. Ekki var þó haldið um leið í Smuguna þar sem veðurskilyrði voru ekki hin bestu þar. Rétt fyrir helgi var hinsvegar haldið í Smuguna og gafst þá makríllinn og hafa íslensku skipin nú landað rúmlega 70 þúsund tonnum af þeim 144 þúsund tonnum sem heimildir eru fyrir.
Innan við 3 sólarhringa að fylla
Í nótt kom Hoffell SU til hafnar á Fáskrúðsfirði með tæp 1.300 tonn af makríl úr Smugunni sem er í um 360 mílna fjarlægð frá heimahöfn. „Góð veiði var í þessum túr aðeins 2 1/2 sólarhring tók að fá aflann,“ segir á vef Loðnuvinnslunnar um veiðina.
Að þessari síðustu löndun meðtalinni er Hoffell búið að landa um 5.300 tonnum það sem af er makrílvertíð. Gert er ráð fyrir að skipið haldi til veiða á ný strax að löndun lokinni.
Miklu smærri fiskur
Sem fyrr segir eru fjölmörg skip á veiðum í Smugunni og kom Beitir NK til Neskaupstaðar í gær með 1.850 tonn og Margrét EA landaði 1.750 tonnum í Egersund í Noregi. Vilhelm Þorsteinsson ES er á landleið með 1.500 tonn.
„Nú er veitt í Smugunni og þar var alveg glimrandi veiði á meðan við vorum úti. Skipin voru að fá allt upp í 400 tonn í holi. Skipin í okkar samstarfi voru að veiðum í syðri hluta Smugunnar, um 350 mílur austnorðaustur af Norðfjarðarhorni,“ segir Tómas Kárason, skipstjóri á Beiti, í færslu á vef Síldarvinnslunnar.
„Þarna veiðist miklu smærri fiskur en sá sem veiddist í íslensku lögsögunni. Fiskurinn sem þarna fæst er mikið 370 – 400 grömm en fiskurinn sem veiddist í okkar lögsögu var gjarnan 500 – 600 grömm. Mér finnst vertíðin hafa gengið býsna vel til þessa og það er afar mikilvægt hve mikið hefur veiðst í íslenskri lögsögu. Svo bíður norsk – íslenska síldin handan við hornið og það verður spennandi að fá að glíma við hana,“ segir Tómas.
„Gleymum því ekki að okkar vali fylgir ábyrgð“
Eldgosinu er lokið
Þurfa að taka myndir áður en goslokum er lýst yfir
Kristrún og Bjarni tókust hart á um efnahagsmálin
Þrefalt stærra en gosin í desember og janúar
Vannýtt alþjóðleg tækifæri í heilbrigðiskerfinu