Lögreglustjórinn á Vestfjörðum felldi fyrr í þessum mánuði niður rannsókn á því hvort lögbrot leiddi til þess að eldislaxar sluppu úr kvíum fiskeldisfélagsins Arctic Fish í Patreksfirði ágúst 2023. Ákvörðunin var tekin með vísan til 145. greinar í lögum um meðferð sakamála sem bendir til þess að embættið telji gögn málsins ekki nægileg eða líkleg til þess að leiða til sakfellingar.

Þetta kemur fram í umfjöllun Bæjarins Besta.

Þar er fullyrt að Stein Ove Tveiten, forstjóri Arctic Fish, hafi verið til rannsóknar, nánar til tekið hvort hann bæri refsiábyrgð á því að fiskur slapp úr eldiskvínni með því að vanrækja að til staðar væri nauðsynlegur umbúnaður við fiskeldið.

Fjöldi laxa sluppu

Greint var frá því í ágúst 2023 að tvö göt hefðu fundist á sjókví númer átta hjá Arctic Seafarm, dótturfélagi Arctic Fish, í Kvígindisdal í Patreksfirði. Í kvínni voru 72.522 fiskar og er talið að um 3.500 laxar hafir strokið.

Gripið var til umfangsmikilla aðgerða til að endurheimta fiskinn og voru meðal annars kallaðir út kafarar frá Noregi til að elta strokulaxana uppi í ám. Fundust eldislaxar í ám víða um land.

Frétt af mbl.is

Strokulaxar setja mark sitt á laxveiðiár

Í kjölfar atviksins fór Matvælastofnun fram á opinbera rannsókn á hugsanlegum lögbrotum Arctic Fish á lögum um fiskeldi.

September 2023 upplýsti Helgi Jensson, lögreglustjóri á Vestfjörðum, að kæra hefði verið lögð fram og að málið væri til meðferðar hjá embættinu. Í desember komst hins vegar embættið að þeirri niðurstöðu að ekki væri grundvöllur til að halda málinu áfram.

Ríkissaksóknara barst í kjölfarið 27 kærur vegna ákvörðunar lögreglustjóra um að fella málið niður, meðal annars frá Matvælastofnun.

Frétt af mbl.is

Ákvörðun lögreglustjórans kærð

Það var síðan í apríl á síðasta ári sem ríkissaksóknari felldi úr gildi ákvörðun lögreglustjórans og gerði honum að rannsaka málið, en sem fyrr segir hefur lögreglustjórinn á Vestfjörðum nú fellt málið niður á ný.

Tengdar fréttir

Fiskeldi

Aldrei meira af íslenskum eldisfiski

• Laxey fjárfestir í búnaði frá Marel
• Framleiddu 502 þúsund tonn af laxi
• Opnar kvíar bannaðar á vesturströnd BNA
• Magdalena nýr forstöðumaður hjá AF

» Fleiri tengdar fréttir

Slysslepping í Patreksfirði 2023

Strokulaxar setja mark sitt á laxveiðiár

• Ákvörðun lögreglustjórans kærð
• Lögreglan hættir að rannsaka Arctic Sea Farm
• Þriðja kafarasveitin frá Noregi er mætt
• Hafa greint 161 strokulax

» Fleiri tengdar fréttir

• Blogga um frétt