Hinn eini rétti svefnpoki
Valgerður Húnbogadóttir
Setja bókamerki
Mér datt ekki í hug að það gæti skipt svo miklu máli hvernig svefnpokinn væri. Við sváfum á örþunnum einangrunardýnum og í tveggja manna göngutjaldi, en við vorum tveir fullorðnir og tvö börn og ég í þokkabót komin fimm mánuði á leið. Í stuttu máli sváfum við hrikalega illa. Ég hef lært heilmikið síðan þá, til dæmis að góður svefnpoki er undirstaða góðs svefns í tjaldi. Þess vegna langar mig að deila því sem ég hef lært, en vil þó taka fram að ég er enginn svefnpokasérfræðingur.
Lengd svefnpokans
Svefnpokarnir sem ég og maðurinn minn keyptum okkur voru 190 cm á lengd. Ég er 165 cm og maðurinn minn 172 cm. Þarna voru fyrstu mistökin gerð. Það skiptir miklu máli að svefnpokinn sé ekki mikið lengri en maður sjálfur því annars er of mikið loftrými sem líkaminn þarf að hita upp. Of langur svefnpoki verður þess vegna kaldur svefnpoki. En ef þú átt nú þegar of langan svefnpoka eða færð lánaðan svefnpoka sem er of langur þá er ekkert því til fyrirstöðu að nota hann samt. Notaðu hugmyndaflugið þegar það kemur að þeim búnaði sem þú hefur aðgang að enda er mikilvægt að nýta þann búnað sem maður hefur. Það er til dæmis hægt að setja belti utan um pokann neðan við iljarnar og þrengja að eða binda snæri utan um pokann. Þannig styttir maður pokann og minnkar rýmið sem líkaminn þarf að hita upp. Svefnpokinn sem ég á í dag hentar fólki sem er allt að 172 cm.
Hitamörkin
Áður en þú festir kaup á svefnpoka skaltu athuga vel hitamörkin á pokanum. Þetta eru upplýsingar sem má finna á öllum vönduðum svefnpokum sem eru á markaðnum. Pokarnir eru prófaðir áður en þeir eru settir á markað til að kanna þægindamörk og sársaukamörk þegar kemur að hitastigi. Það er hinsvegar mjög mismunandi hversu vel fólk þolir kulda. Minn poki er með þægindamörk niður í -6 gráður. Ég miða því við að sofa ekki úti í honum í meira en -4 gráðum til öryggis, nema þá að taka með einangrunarteppi og auka einangrunardýnu undir loftdýnuna mína.
Dúnn eða gerviefni?
Margir hallast að dúnpokum enda geta þeir verið mjög léttir og hlýir og taka ögn minna pláss í bakpokanum. Það að þeir séu léttir gerir það að verkum að þeir henta afar vel í lengri leiðangra þar sem huga þarf vel að þyngd bakpokans. Versti óvinur dúnsvefnpokans er hinsvegar raki og rakur svefnpoki getur orðið kaldur svefnpoki. Sjálf valdi ég gervipoka þrátt fyrir að hann sé 1,5 kg. Kosturinn við svefnpoka með gerviefnafyllingu er að pokinn heldur hita þrátt fyrir að hann blotni. Það gerist reglulega að svefnpokinn minn blotni í miklum raka á næturnar og þegar ég fer í útilegur að vetrarlagi, en minn svefnpoki er með svokallaðri ThermalQ fyllingu. Hinsvegar þykja dúnpokar endast lengur en svefnpokar með gervifyllingu.
Þínar þarfir
Þegar þú fjárfestir í svefnpoka mæli ég með því að fara vel yfir þínar þarfir. Ætlarðu eingöngu að sofa úti á sumrin eða viltu geta farið í útilegu á öðrum árstíma líka? Sjálf vildi ég helst poka sem eingöngu vegur 1 kg en er með þægindamörk niður í -8 gráður. En þá er maður kominn upp í svefnpoka sem kostar á við hjónarúm. Það getur þess vegna tekið langan tíma að finna hinn eina rétta svefnpoka og við verðum öll að forgangsraða eftir eigin þörfum og óskum þegar við förum í bakpokaferðir í óbyggðum.
Ég vona að þessi skrif geri örlítið gagn á leið þinni í gegnum svefnpokafrumskóginn mikla.
Viðræður ekkert þokast frá því á þriðjudag
Vegirnir voru eins og borðstofuborð
Þarf að koma til móts við ólíkar þarfir lækna
Hentugt gos fyrst gýs á annað borð
Yfir 300 stæði fóru undir hraun
Hraun kemur úr þremur gígum: Virknin stöðug
Pútín reynir allt til að forðast aðra herkvaðningu
