Love Island-parið Leah Taylor og Montel McKenzie hefur slitið sambandi sínu, einungis nokkrum vikum eftir að þau voru rekin úr Love Island-villunni. Þáttaröðinni, sem er sú tíunda í röðinni, er þó ekki lokið en lokaþáttur hennar verður sýndur þann 31. júlí næstkomandi.
Samkvæmt heimildum DailyMail ákvað Taylor að betra væri að þau væru bara vinir en hún segist þó vera þakklát fyrir þann tíma sem þau eyddu saman. Þau eru ekki eina parið sem hættir saman svo stuttu eftir að hafa verið rekin úr villunni.
Catherine Abaje og Elom Ahlijah-Wilson eru sögð hafa hætt saman í laumi nánast um leið og þau komu aftur heim. Samkvæmt heimildum Sun hafi parið átt í erfiðleikum með að láta sambandið ganga upp og hittust örsjaldan eftir að þátttöku þeirra í þáttunum lauk.
Bæði pörin voru rekin óvænt heim fyrir tveimur vikum eftir að áhorfendur völdu það par sem virtist passa best saman.