Veröld/Fólk | mbl | 26.7.2024 | 19:15 | Uppfært 20:47

„Sóli fær ennþá útrás í að gera lítið úr okkur“

Strákasveitin IceGuys mun hefja tökur á nýrri sjónvarpsseríu í ágúst. Samsett mynd

Strákasveitin IceGuys var stofnuð fyrir ári síðan og samanstendur af tónlistarmönnunum Aroni Can, Friðriki Dór, Herra Hnetusmjöri, Jóni Jónssyni og Rúrik Gíslassyni. Í upphafi kom það eflaust einhverjum á óvart að þessi hópur af ólíkum listamönnum kæmu saman í strákabandi, en þeir hafa hins vegar slegið rækilega í gegn frá því þeir gáfu út sitt fyrsta lag, Rúletta.

Í október í fyrra voru samnefndir sjónvarpsþættir um sveitina frumsýndir á Sjónvarpi Símans í leikstjórn Hannesar Þórs Halldórssonar, Allans Sigurðssonar og Hannesar Þórs Arasonar í samstarfi við framleiðslufyrirtækið Atlavík. Þættirnir komu mörgum á óvart og nutu mikilla vinsælda.

Tökur á annarri seríu IceGuys munu hefjast í ágúst og er mikil spenningur kominn í hópinn. „Það er auðvitað öðruvísi að gera hlutina í annað sinn. Í fyrra vissi enginn hvað þetta var og hvert útspil kom á óvart. En frábæru viðtökurnar urðu svo auðvitað til þess að metnaðurinn óx og hugmyndirnar með,“ segja IceGuys.

Strákarnir bæta því við að þeir láti pressuna ekki á sig fá og lofa áhorfendum enn meiri gleði.

„Iceguys eru góðir undir pressu og við erum svakalega spenntir að fara í tökur núna í ágúst fyrir aðra þáttaröð af IceGuys. Allt gerðist svo hratt í fyrra og það er magnað hvað við vorum heppnir með útkomuna. Við lofum áhorfendum áframhaldandi gleði og einlægni og tökum okkur alls ekkert of hátíðlega. Sóli fær ennþá góða útrás í að gera lítið úr okkur,“ segja IceGuys.

Taka IceGuys á næsta stig

Strákasveitin keyrði ísvélina aftur í gang á dögunum þegar þeir gáfu út nýtt lag, Gemmér Gemmér, og tónlistarmyndband. Strákarnir segjast vera spenntir að taka IceGuys upp á næsta stig með því að leggja ennþá meiri metnað í dansatriði, búningagerð, tónleikahald og framleiðslu.

„Vonandi gefur þetta myndband góð fyrirheit um það sem koma skal. Okkur langaði öllum að gera hlutina stærri núna þegar við lögðum aftur á stað í ferðalag um ísheiminn. Dansinn hjá Stellu Rósenkranz er erfiðari, búningarnir hjá Sylvíu Lovetank voru gerðir alveg frá grunni og allt umfang var meira hjá Atlavíkurgenginu, sem sér um leikstjórn og framleiðslu á öllu því sem IceGuys gera,“ segja strákarnir.

Hannes segir að tónlistarmyndbandið hafi þó aðeins verið upphitun.

„Þetta tónlistarmyndband var frábært verkefni og allur hópurinn skemmti sér virkilega vel við framleiðsluna. Við lögðum mikla vinnu í myndbandið og planið var að gefa IceGuys heiminum einn nýjan gír með stóru myndbandi og frábæru lagi. En þetta var bara upphitun. Nú er búið að ræsa vélarnar og næsta mál eru tökur á seríu tvö af IceGuys þáttunum sem fara í gang á næstunni og okkur hlakkar mikið til að kafa dýpra í IceGuys ævintýrin,“ segir Hannes.

Tónleikaveisla í desember

Það er nóg um að vera hjá strákunum sem munu bráðlega hefja stífan undirbúning fyrir tónleika þeirra sem munu fram í Laugardalshöll í desember en aðdáendur mega búast við miklu sjónarspili.

„Nú höfum við haft ár til stefnu í undirbúningnum og talandi um að stækka hlutina þá verðum við í Laugardalshöllinni í desember. Við eigum svo ótrúlega skemmtilega og góða aðdáendur og þeir eiga skilið að fá eftirminnilegasta „showið.“ Allt tæknigengið lofar meistarasnilld og við sjálfir læsum okkur inni í dansæfingabúðum frá miðjum nóvember og fram að tónleikum,“ segja IceGuys.