Pólska lögreglan hefur handtekið „yfir 50” flóttamenn skammt frá landamærunum að Hvíta-Rússlandi, að sögn talsmanns lögreglunnar.

Um tvo mismunandi hópa flóttamanna var að ræða sem reyndu að komast ólöglega yfir landamærin og komust einhverjir þeirra undan lögreglunni.

Frétt af mbl.is

Pólverjar stöðva fjölda flóttamanna við landamæri

Stjórnvöld í Hvíta-Rússlandi hafa sakað pólskar öryggissveitir um að berja þó nokkra flóttamenn sem hafa reynt að komast yfir landamærin.

Gagnrýnendur frá Vesturlöndum hafa í marga mánuði sakað Hvíta-Rússland um að lokka flóttamenn frá Mið-Austurlöndum til Hvíta-Rússlands og senda þá yfir landamærin til Evrópusambandsins í hefndarskyni vegna refsiaðgerða.

Kúrdar frá Dohuk í Írak við landamæri Póllands og Hvíta-Rússlands. AFP

Hundruð flóttamanna eru fastir við landamærin í köldu loftslagi með pólska og hvítrússneska hermenn sitt hvorum megin við landamærin.

Landamæraverðir Hvít-Rússa sögðu í yfirlýsingu í morgun að fjórir Kúrdar hafi verið lamdir af pólskum öryggisvörðum er þeir reyndu að komast yfir landamærin.