Stjórnvöld í Jemen sögðu frá því í dag að níu hefðu látist úr kóleru í borginni Aden, næststærstu borg landsins. Sjúkdómurinn breiðust nú hratt út í þessu stríðshrjáða landi sem er það fátækasta á Arabíuskaganum.
Tíu til viðbótar hafa verið greindir með kóleru í Aden. Sjúkdómurinn smitast með menguðu vatni, veldur miklum niðurgangi og getur verið lífshættulegur fái fólk ekki læknisaðstoð fljótt.
190 hafa verið lagðir inn á sjúkrahús í Aden með alvarlegan niðurgang. Um 200 tilfelli hafa verið tilkynnt víðsvegar um landið.
Sameinuðu þjóðirnar sögðu frá því fyrr í október að kólerufaraldur hefði brotist út í Jemen. Borgarastríð hefur geisað þar í tæp tvö ár.