Erlent | mbl | 23.3.2017 | 16:09

Var að fagna brúðkaupsafmæli

Kurt og Melissa voru í London til að fagna 25 ára brúðkaupsafmæli sínu.

Þriðja fórnarlamb árásarmannsins í London sem nafngreint er var Bandaríkjamaðurinn Kurt Cochran. Hann var að halda upp á 25 ára brúðkaupsafmæli sitt í borginni ásamt eiginkonu sinni, Melissu.

Cochran var frá Utah í Bandaríkjunum. Hann var á sextugsaldri.

Hjónin höfðu verið á ferðalagi um Evrópu og ætluðu að snúa aftur til Bandaríkjanna í dag.

Tveir aðrir létust í árás mannsins.

Lögreglumaðurinn Keith Palmer og kennarinn Aysha Frade létust í árásinni í London í gær.

Lögreglumaðurinn sem var stunginn til bana hét Keith Palmer og var 48 ára. Hann átti eiginkonu og börn. Hann vann við öryggisgæslu við þinghúsið. Hann hafði verið lögreglumaður í fimmtán ár.

Áður fyrr gegndi hann herþjónustu og um tíma við hlið James Cleverly sem er nú þingmaður á breska þinginu. Cleverly skrifaði á Twitter um vin sinn: „Elskulegur maður, vinur. Ég er harmi lostinn.“

Kona lést líkt og Cochran á brúnni. Hún hét Aysha Frade og var 43 ára. Hún var breskur ríkisborgari en fædd á Spáni. Hún kenndi spænsku í skóla í London.

Fljótlega eftir að árásin var gerð sagði læknirinn Coleen Anderson, sem stödd var á brúnni, að hún hefði úrskurðað konu látna á vettvangi.

„Hún lá undir hjólum strætisvagns,“ sagði Anderson. Ekki er ljóst hvernig dauða konunnar bar nákvæmlega að en mikið öngþveiti skapaðist á brúnni er árásarmaðurinn ók bíl sínum þar um á mikilli ferð.

Frétt Sky um þriðja fórnarlambið.