Erlent | mbl | 10.9.2018 | 7:54 | Uppfært 12:00

Telja daga Löfven á stjórnarstóli talda

Stefan Löfven forsætisráðherra Svíþjóðar sýnir ekki á sér neitt fararsnið. Stjórnmálaskýrendur telja daga hans á forsætisráðherrastóli þó vera talda. AFP

Stefan Löfven, forsætisráðherra Svíþjóða, kveðst ekki ætla að segja af sér eftir niðurstöður þingkosninga í Svíþjóð í gær. Sósíaldemókratar, flokkur Löfvens, hafði fengið 101 þingsæti er búið var að telja 99,95% atkvæði. Fengu Sósíaldemókratar 28,4% atkvæða, sem er 2,8% minna en síðast.

Rauðgræna blokkin, sem samanstendur af Sósíaldemókrötum, Græningjum og Vinstriflokknum, fékk 144 þingsæti, en Hægribandalagið fékk einu þingsæti minna eða 143 þingsæti. Svíþjóðardemókratarnir fengu svo 62 þingsæti og eru nú þriðji stærsti flokkurinn á eftir Sósíaldemókrötum og Moderaterna.

Frétt af mbl.is

Rauðgrænir einum fleiri

Flestir stjórnmálaskýrendur virðast þó þeirrar skoðunar að dagar Löfven á stóli forsætisráðherra séu taldir og telja orð hans um endalok blokkapólitíkur til merkis um það. „Enginn einn flokkur getur leitt Svíþjóð, en þeir sem vilja bæta landið verða að taka sig saman,“ sagði Löfven.

Er það mat stjórnmálaskýrenda Aftonbladet að Ulf Kristerson, formaður Moteraterna, verði sá sem fyrst leggi upp í stjórnarmyndunarviðræður, þó að flokkurinn hafi tapað 14 þingsætum frá síðustu kosningum.

Jimmie Åkesson, leiðtogi Svíþjóðardemókratanna, hefur raunar þegar boðið Kristersson til viðræðna og segir það í samræmi við niðurstöður kosninganna.

Stjórnmálaskýrendur segja þó mikla óvissu um það hvernig stjórnarmyndunarviðræður eigi eftir að ganga, enda þurfi blokkirnar sem flokkarnir höfðu skipað sér í mögulega að riðlast svo hægt verði að mynda stjórn.

Segir danska ríkisútvarpið að niðurstaðan kunni í raun að ráðast ekki af því hversu marga þingmenn væntanleg stjórn fái til liðs við sig, heldur hversu margir þingmenn séu henni mótfallnir.

Þá ríkir að mati sænskra og danskra stjórnmálaskýrenda ekki minni óvissa um það hvort sú stjórn sem mynduð verði muni halda.