Ulf Kristersson, leiðtogi hægriflokksins Moderaterna, hefur fengið umboð forseta sænska þingsins til að mynda ríkisstjórn. Andreas Norlén, þingforseti og samflokksmaður Kristersson, greindi frá þessu í dag en hann hefur síðustu daga fundað með formönnum flokkanna sem eiga sæti á sænska þinginu.

Á blaðamannafundi í þinghúsinu, sem hófst nú fyrir stundu, sagði Kristersson að hann myndi gera allt sem er „löglegt og viðeigandi“ til að mynda ríkisstjórn hægribandalagsins, Alliansen, en að því standa, auk Moderaterna, Frjálslyndir, Miðflokkurinn og Kristilegir demókratar.

Hans fyrsta verk verður, að eigin sögn, að ráðfæra sig við formenn hinna flokka hægribandalagsins en því næst vill hann ræða við Stefan Löfven, formann Sósíaldemókrata og sitjandi forsætisráðherra. Mun hann að öllum líkindum freista þess á ný að sannfæra Löfven um að veita minnihlutastjórn hægribandalagsins stuðning.

Aðspurður sagði Kristersson að hann hefði ekki í hyggju að ræða við Svíþjóðardemókrata að sinni heldur hygðist hann einbeita sér að viðræðum við hina samstarfsflokkana í hægribandalaginu og Sósíaldemókrata.

Frétt af mbl.is

Löfven vill ekki styðja hægribandalagið

Tengdar fréttir

Þingkosningar í Svíþjóð 2018

SVT braut gegn hlutleysisákvæði

• Löfven verður forsætisráðherra
• Löfven verði áfram forsætisráðherra
• Norlén ræðir við formenn flokka
• Aftur á byrjunarreit

» Fleiri tengdar fréttir

• 1 blogg um fréttina

Bloggað um fréttina

• Gústaf Adolf Skúlason: Klífið úr háum söðli ykkar - sjáið þið ekki gremjuna? …