Segir allar ásakanirnar uppspuna
Setja bókamerki
Donald Trump Bandaríkjaforseti segir að allar ásakanir um kynferðisofbeldi á hendur Brett Kavanaugh séu uppspuni.
Kavanaugh sór embættiseið sinn sem dómari við Hæstarétt Bandaríkjanna á laugardag, aðeins tveimur klukkustundum eftir að öldungadeildin samþykkti tilnefningu Trumps á Kavanaugh með 50 atkvæðum gegn 48 eftir miklar umræður og mótmæli gegn skipun hans.
Eftir að Trump tilnefndi Kavanaugh í embættið stigu þrjár konur fram og sökuðu hann um kynferðisofbeldi þegar hann var unglingur og þegar hann stundaði nám við Yale-háskóla. Tvær sögðust hafa orðið fyrir því sjálfar og ein orðið vitni að slíku.
Trump segist fordæma Demókrataflokkinn og fyrirætlanir hans um að Kavanaugh verði sviptur embætti (e. impeachment). „Maður sem gerði ekkert rangt, maður sem var neyddur í blekkingarleik sem var settur upp af demókrötum og lögmönnum þeirra, og núna vilja þeir svipta hann embættinu,“ sagði Trump við blaðamenn í Hvíta húsinu í dag, áður en hann hélt til Flórída.
„Að mínu mati er þetta móðgun við bandarísku þjóðina,“ bætti forsetinn við.
Trump spáir því jafnframt að demókratar muni bíða ósigur í komandi þingkosningum í nóvember, kosningum sem munu móta framtíð forsetaembættis hans.
Sérstök athöfn fer fram í Hvíta húsinu í kvöld í tilefni af embættistöku Kavanaugh. Á þriðjudag mun hann formlega taka sæti við Hæstarétt Bandaríkjanna.
Kílómetragjald: „Mikilvægt að málið verði klárað fyrir þinglok“
Oddvitaviðtöl í Reykjavík suður
„Ég er bara vongóður“
Endurskoða starfsleyfi bálstofu kirkjugarðanna
Skúli sýknaður en 780 milljóna greiðslum rift
„Þetta var hræðileg stund“
Stjórnvöld stíga ekki inn í kjaradeilurnar
Bindur vonir við að koma fjárlögunum í gegn