Forseti Frakklands, Emmanuel Macron, hefur undanfarið staðið fyrir fundum víðs vegar um Frakkland þar sem málefni þjóðarinnar eru rædd. Í gær var slíkur fundur haldinn í Elysée-höll og talaði forsetinn í átta klukkustundir og tíu mínútur. Afar fáir voru eftir í salnum þegar hann lauk máli sínu.

Fyrir tveimur og hálfum mánuði hóf Macron vegferð sína undir slagorðinu Grand Débat des Idées en þar rökræðir hann við vísindamenn og hugsuði um framtíð Frakklands og hugmyndafræðina þar á bak við. Herferðin fór af stað í kjölfar mótmæla gulvestunga. 

Á fyrri fundum hefur Macron sýnt mikið þol við að svara spurningum kjósenda um allt á milli himins og jarðar. Allt frá lokunum spítala til utanríkismála í fjórar til fimm klukkustundir. En fundinum í gærkvöldi lauk ekki fyrr en klukkan 2:30 í nótt. Þegar yfir lauk höfðu jafnvel einhverjir formlegir þátttakendur í umræðunum yfirgefið salinn. Umræðan bar yfirskriftina: helstu áskoranir og málefni sem blasa við Frökkum í framtíðinni og fór fram í forsetabústaðnum. Fundurinn var sendur beint út á France Culture-útvarpsstöðinni. 

Fylgisaukning upp á 8%

60 hugsuðir, hagfræðingar og vísindamenn á sviði umhverfismála tóku þátt ásamt Macron í gærkvöldi. Allt bendir til þess að fundirnir að undanförnu hafi haft góð áhrif á hug kjósenda í garð forsetans því vinsældir hans hafa aukist um 8% frá því desember og nýtur hann stuðnings 31% kjósenda. 

Gulvestungar hófu mótmæli sín um miðjan nóvember og í fyrstu snerust mótmælin um skatta á eldsneytisverð en breyttust fljótt í mótmæli við stjórnunarstefnu Macron sem ýmsum þykir taka of mikið tillit til viðskiptahagsmuna á kostnað almennings. 

Alls voru um 10 þúsund fundir skipulagðir á vegum stjórnvalda frá því um miðjan janúar en herferðinni lauk formlega á föstudaginn. 

23 milljarða króna kröfur vegna skemmdarverka

Samkvæmt upplýsingum frá frönskum tryggingafélögum hafa verið lagðar fram skaðabótakröfur vegna skemmda sem gulvestungar hafa unnið upp á 170 milljónir evra, tæplega 23 milljarða króna. Inni í þeirri tölu eru ekki skemmdir sem unnar voru um síðustu helgi þegar allt keyrði um þverbak á Champs-Élysées. Kröfuhafar eru um 10 þúsund talsins.

Í gær rak ríkisstjórnin lögreglustjóra Parísarborgar úr starfi en ástæðan fyrir brottrekstrinum er að lögreglunni tókst ekki að hafa hemil á óeirðarseggjum helgarinnar. Um fimm þúsund lögreglumenn voru á vakt í höfuðborginni á laugardag. Þann dag lögðu nokkur hundruð svartklæddir óeirðarseggir breiðgötuna Champs-Élysées nánast í rúst að hluta. Eigendur fyrirtækja eru búnir að fá sig fullsadda af ástandinu í borginni og var haldinn aukafundur í ríkisstjórninni vegna málsins í gær.

Édouard Charles Philippe forsætisráðherra ávarpaði þjóðina í gær og sagði stöðu mála óþolandi. Hann greindi frá því að Michel Delpuech hafi verið rekinn úr embætti lögreglustjóra og nýr lögreglustjóri yrði kynntur til sögunnar á miðvikudag.

Mótmæli yrðu bönnuð á Champs-Élysées og annars staðar ef óeirðarseggir myndu taka þátt og sektir yrðu hækkaðar úr 38 evrum í 135 evrur ef fólk tæki þátt í ólöglegum mótmælum.

Yfir eitt hundrað fyrirtæki urðu fyrir barðinu á skemmdarvörgum um helgina í París og þar á meðal tugir verslana og veitingastaða við Champs-Elyées.