Erlent | AFP | 26.4.2019 | 7:10 | Uppfært 7:30

Hundruð í sóttkví vegna mislinga

Mislingafaraldur geisar í Kaliforníu líkt og víða um heiminn. AFP

Hundruð nemenda og starfsmanna við tvo háskóla í Kaliforníu hafa verið settir í sóttkví vegna mislingafaraldurs sem þar geisar. Það sem af er ári hafa komið upp 695 mislingatilvik í Bandaríkjunum og á heimsvísu hefur mislingatilvikum fjölgað um 300% á fyrstu þremur mánuðum ársins samanborið við síðasta ár.

Frétt af mbl.is

Neyðarástand í Brooklyn

Heilbrigðisyfirvöld í Kaliforníu segja að hundruð nemenda og kennara við University of California Los Angeles (UCLA) og California State University (Cal State) hafi verið í samskiptum við fólk með mislinga nýverið og þeir sem ekki gátu sannað að þeir hafi verið bólusettir fyrir mislingum voru settir í sóttkví.

Samkvæmt upplýsingum frá UCLA þurftu 100 manns að fara í sóttkví vegna samskipta við mislingasmitaða. Við Cal State voru 156 nemendur og starfsmenn settir í sóttkví. Alls tæplega 300 manns.

Frétt af mbl.is

Neyðarástand vegna mislinga

Ekki hafa komið upp jafn mörg mislingasmit í Bandaríkjunum í fjölmörg ár en þetta er rakið til alþjóðlegrar bylgju gegn bólusetningum. Talið er að 169 milljónir barna hafi ekki verið bólusett (fengið fyrri bólusetninguna) gegn mislingum á árunum 2010 til 2017, samkvæmt skýrslu Barnahjálpar Sameinuðu þjóðanna, UNICEF.

California State Los Angeles-háskólinn hefur gripið til óvanalegra ráðstafana vegna mislinga. AFP

Andstaðan við bólusetningar fór víða um Vesturlönd en hvergi í líkingu við það sem var í Bandaríkjunum þar sem samfélagsmiðlar voru fullir af tilhæfulausri umræðu um hættuna sem fylgdi bólusetningum.

Frétt af mbl.is

Mislingafaraldurinn líklega stöðvaður

Undanfarin ár hefur Alþjóðaheilbrigðismálastofnunin (WHO) tileinkað bólusetningum í Evrópu eina viku á ári og í ár eru það dagarnir 24.–30. apríl.

Í ár er vikan tileinkuð almenningi, heilbrigðisstarfsmönnum, foreldrum og börnum sem með þátttöku og framlagi sínu í málefnum bólusetninga hafa bjargað hundruðum milljóna einstaklinga frá alvarlegum afleiðingum smitsjúkdóma.

Með bólusetningum er árlega komið í veg fyrir ótímabæran dauða 2–3 milljóna barna í heiminum öllum. Markmiðið með bólusetningum er að hindra farsóttir, útrýma smitsjúkdómum og draga úr hættulegum afleiðingum þeirra. Á Íslandi má fullyrða að bólusetningar hafi komið í veg fyrir alvarlegar afleiðingar smitsjúkdóma hjá tugum þúsunda einstaklinga, segir á vef embættis landlæknis.

Mislingar hafa geisað í skólum þar sem rétttrúnaðargyðingar eru fjölmennir þar sem þeir láta ekki bólusetja börn sín. AFP

80 látnir úr mislingum í Evrópu

Þó að bólusetningar hafi komið í veg fyrir milljónir alvarlegra sjúkdómstilfella (einkum hjá börnum) á síðasta ári þá greindust fleiri einstaklingar með mislinga í Evrópu á árinu 2019 en sést hafa í langan tíma vegna lélegrar þátttöku í bólusetningu. Á árinu 2019 greindust rúmlega 80.000 einstaklingar með mislinga í Evrópu, um 60% þeirra þurftu á sjúkrahúsvist að halda og um 80 (0,1%) létust.

Með alþjóðlegu bólusetningarvikunni vill WHO einnig benda á að bólusetningar eru ein hagkvæmasta og árangursríkasta aðgerð sem völ er á til að koma í veg fyrir alvarlega smitsjúkdóma hjá öllum aldurshópum. Því eru allar þjóðir hvattar til að tryggja börnum og fullorðnum gott aðgengi að bólusetningum.

Á Íslandi hafa bólusetningar komið í veg fyrir margar alvarlegar sýkingar og greinast hér vart lengur þeir sjúkdómar sem bólusett er gegn. Til þess að tryggja þennan árangur til lengri tíma mega yfirvöld og almenningur ekki sofna á verðinum og kappkosta þarf að halda hér uppi góðri almennri þátttöku.