Erlent | AFP | 21.7.2019 | 16:16

Gúmmíkúlum skotið á mótmælendur

Lögreglumaður skýtur táragashylki að mótmælendum í Hong Kong í kvöld. AFP

Lögregla í Hong Kong skaut gúmmíkúlum á og beitti táragasi gegn hópi mótmælenda í borginni í kvöld. Mótmæli hafa staðið þar yfir alla helgina, sjöundu helgina í röð, og nú þegar komið er fram á sunnudagskvöld hefur komið til átaka á milli mótmælenda og óeirðalögreglu, auk þess sem gagnmótmælendur hafa barið á þeim sem mótmæla stjórnvöldum.

Fréttamaður AFP á staðnum sá óeirðalögreglu skjóta fjölda gúmmíkúlna að mótmælendum, sem höfðu tekið yfir götur í hjarta borgarinnar og BBC greinir frá því að lögregla hafi varpað táragashylkjum til þess að dreifa mannfjöldanum eftir að lögregla var grýtt af mótmælendum.

Frétt af mbl.is

Sér ekki fyrir endann á mótmælunum

Fækkað hefur í hópi mótmælenda á götum úti, en þeir sem eru enn úti hafa látið ófriðlega í kvöld. BBC greinir frá því að skemmdarverk hafi verið unnin, til dæmis við skrifstofur kínverskra stjórnvalda í borginni.

Á skilti þar fyrir framan hefur meðal annars verið spreyjað: „Þið kennduð okkur að friðsamleg mótmæli eru gagnslaus“.

Fækkað hefur í hópi mótmælenda á götum úti, enda komið fram yfir miðnætti, en þeir sem eftir eru hafa látið ófriðlega og tekist á við lögreglu. AFP

AFP greinir frá því að í kvöld hafi hópur gagnmótmælenda, grímuklæddra hvítklæddra manna, ráðist að mótmælendum inni á lestarstöð í borginni, en myndskeið af því frá miðlinum Stand News í Hong Kong má sjá hér að neðan.

Sprengiefni fundust á föstudag

Samkvæmt frétt BBC eru um 4.000 lögreglumenn á götum úti til þess að hafa hemil á mótmælendum í kvöld.

Viðbúnaður lögreglu hefur verið mikill þessa helgina, sem mögulega tengist því að á föstudag fann lögregla í Hong Kong tvö kíló af sprengiefninu TATP, 10 bensínsprengjur, hnífa og fleiri vopn í í iðnaðarhúsnæði í borginni.

Þrír eru í haldi vegna málsins, en sprengiefnið fannst, að sögn lögreglu, innan um muni sem tengdust mótmælahreyfingunni, bæklinga og stuttermaboli.

Frétt BBC um mótmælin