Erlent | AFP | 27.12.2022 | 7:50 | Uppfært 29.12.2022 16:21

Serbneskar hersveitir í „hæstu viðbragðsstöðu“

Ítalskir hermenn, sem eru hluti af alþjóðlegu friðargæsluliði NATO, standa vörð við veg þar sem vegatálmar hafa verið settir upp við þorpið Rudare, skammt frá bænum Zvecan í Kósovó gær. AFP/Armend Nimani

Serbneskar hersveitir eru í „hæstu viðbragðsstöðu“, að sögn varnarmálaráðherra landsins, Milos Vucevic.

Aukin spenna ríkir á milli landanna en Kósovó lýsti yfir sjálfstæði frá Serbíu árið 2008.

Frétt af mbl.is

Serbía og Kósovó á barmi vopnaðra átaka

Serbnesk stjórnvöld hafa neitað að viðurkenna sjálfstæði landsins og hafa hvatt þá 120 þúsund manns af serbneskum uppruna sem búa í Kósovó til að bjóða yfirvöldum í Kósovó birginn, sérstaklega í norðurhluta landsins þar sem fólk af serbneskum uppruna er í meirihluta.

Serbneski herinn hefur oft á síðastliðnum árum verið settur í hæstu viðbragðsstöðu vegna deilna við Kósovó. Síðast gerðist það í nóvember eftir að Serbar sögðu að þó nokkrir drónar hefðu farið í lofthelgi landsins frá Kósovó.

10. desember síðastliðinn settu Serbar í norðurhluta Kósovó upp vegatálma til að mótmæla handtöku fyrrverandi lögregluþjóns sem er grunaður um að hafa tengst árás á lögregluþjóna af albönskum uppruna.