Erlent | mbl | 6.3.2023 | 15:06

Morðingi Everard dæmdur fyrir að bera sig á almannafæri

Fyrrverandi lögreglumaðurinn, Wayne Couzens. AFP/Metropolitan police

Fyrrverandi lögreglumaðurinn, Wayne Couzens, hefur verið dæmdur í 19 mánaða fangelsi fyrir að bera sig á almannafæri, til viðbótar við lífstíðarfangelsið sem hann var dæmdur í fyrir morðið Söru Everard.

Frétt af mbl.is

Morðingi Söru Everard áfrýjar lífstíðardómi

Couzens, notaði lögregluskilríki sín til að handtaka hina 33 ára Everard er hún var á gangi heim til sín í suðurhluta London 3. mars árið 2021. Hann sakaði hana um að hafa brotið reglur í tengslum við Covid-19, handjárnaði hana, setti hana inn í bílinn sinn og nauðgaði henni. Þá kyrkti Couzens hana og kveikti í líkinu í skóglendi um 96 kílómetrum suðaustur af London.

Couzens játaði fyrir dómi í dag að hafa berað kynfæri sín á almannafæri fyrir konum í nóvember árið 2020 og febrúar árið 2021.

Hefði verið hægt að koma í veg fyrir morðið

„Fjórum mánuðum eftir að þú beraðir þig fyrir mér, nauðgaðir þú og myrtir saklausa konu,“ sagði eitt fórnarlamba Couzens í yfirlýsingu fyrir dómi.

Þá sagði hún að lögregla hafi ekki tekið atvikinu alvarlega er hún tilkynnti það. Mögulega hefði verið hægt að bjarga Everard ef það hefði verið gert.

„Hryllingurinn sem gerðist mun fylgja mér restina af ævinni,“ sagði fórnarlambið.

Dómarinn í málinu sagði að sú staðreynd að Couzens hafi komist upp með athæfið hafi einungis ýtt undir þá hugmynd hans að hann væri ósigrandi.