„Þetta fer mjög vel af stað,“ segir Björk Kristjánsdóttir, keppnisstjóri WOW Cyclothon, en hjólreiðakeppnin hófst í gær þegar keppendur í einstaklingskeppni lögðu af stað hringinn í kringum landið. Keppnislið Hjólakrafts lögðu einnig af stað í gær, en liðakeppni í A og B flokki hefst seinnipartinn í dag.
Keppendur eru nú komnir á Norðurland eftir að hafa hjólað í miklum mótvindi í alla nótt. Bandaríkjamaðurinn Peter Colijn er með töluverða forystu og hjólar nú framhjá Laugum í Þingeyjarsveit.
Breyta þurfti rástíma keppenda í gær þar sem stormur og rigning gekk yfir Vesturlandið. Björk segir það þó ekki hafa haft áhrif á keppendur sem hafi staðið sig mjög vel. „Í gærkvöldi var mikill og góður meðvindur alveg fram á Blönduós en þá snerist hann í fangið á keppendum,“ segir Björk. „Það hefur verið talað um að Langidalur hafi öðlast nýja merkingu þar sem hann virtist endalaus.“
Alls taka fjórir keppendur þátt í einstaklingskeppninni, þar af þrír erlendir keppendur. Eini Íslendingurinn sem tekur þátt er Jón Óli Ólafsson, en að sögn Bjarkar hjólaði hann í ellefu klukkustundir í gærkvöldi og nótt án þess að stoppa.
„Hann lætur engan bilbug á sér finna,“ segir Björk, og bætir við að hann hafi fengið sér að borða eftir ellefu klukkustunda legginn, og haldið svo áfram. Jón Óli hefur leyft áhugasömum að fylgjast grannt með undirbúningnum á Facebook-síðu sinni, en hann er að taka þátt í einstaklingskeppninni í annað sinn.
Þá segir hún krakkana í liðum Hjólakrafts hafa staðið sig mjög vel, og tæklað mótvindinn vel. Í liðum Hjólakrafts eru alls 110 keppendur í 11 liðum. Krakkarnir sem taka þátt eru á aldrinum 11-18 ára, en að sögn Bjarkar hafa allir keppendur fengið að spreyta sig.